Մենք ունենք ներքին տեղեկատվություն, որ դեկտեմբերին ռեզուս մակակ տեսակի մեկ կապիկ Գյումրու «Օազիս» ռեստորանից առանց համապատասխան անասնաբուժասանիտարական, կարանտինային պահանջների խախտումով տեղափոխվել է Երեւանի կենդանաբանական այգի։ Այս մասին այսօր՝ փետրվարի 7-ին, լրագրողների հետ հանդիպմանն ասաց ՍԱՊԾ առաջին պետ Գրիգոր Գրիգորյանը:

«Մակակ ռեզուս կապիկները հանդիսանում է հերպես բ վիրուսի կրողներ, որով վարակումը ֆատալ հետեւանքներ է ունենում։ Այս կապիկը առանց համապատասխան պայմաններ ապահովելու պահվել է կենդանաբանական այգու տարածքում՝ անասնաբուժական կլինիկայում, ինչն արգելված է։ Այն մարդիկ, որոնք շփում են ունեցել կապիկի հետ, շատ հնարավոր է վարակված լինեն»,-նշեց նա։