Մամուլում տեղեկություն հայտնվեց այն մասին, որ Նիկոլ Փաշինյանը վաճառում է իր՝ «Հայրենիքի» կինոթատրոնի մոտ գտնվող բնակարանը։ Այն բնակարանը, որտեղից նա տեղափոխվել է կառավարական ամառանոց։ Այն բնակարանը, որը էժանագին քարոզչական նպատակներով հանձնվեց անապահով ընտանիքի՝ Փաշինյանի կնոջ՝ «Օգնենք տուն չունեցողներին և նրանց տանք չբնակեցվող մեր տները» կոչի շրջանակներում։

Եթե նիկոլենք ուզում են վաճառել բնակարանը, նշանակում է ցուցադրական բարեգործական ակցիան ավարտվել է և անապահովներին արդեն վռնդել են կամ էլ «չուժոյներին» տանից կքշեն հենց որ հաջողացնեն այս ճգնաժամի պայմաններում վաճառել բնակարանը։ Հո գնորդներին չե՞ն ասելու, թե բա գնի՛ր վարչապետի բնակարանը և ստացիր բոնուս՝ ի դեմս այդ բնակարանում ապրող անապահովների։

Մեզ չի հետաքրքրում, թե ինչքանով ու երբ կվաճառվի Նիկոլի բնակարանը, որը նա ձեռք է բերել իր ատելի իշխանությունների օրոք կոպեկ-կոպեկ հավաքելով սեփական թերթի վաճառքից առաջացած միջոցները։

Հետաքրքիր է այլ բան։ Ինչո՞ւ է Փաշինյան Նիկոլն այս նեղ մաջալին բնակարանը հանել վաճառքի։ Հազիվ թե այս կորոնավիրուսային ճգնաժամի պայմաններում փողի պակաս ունենա ու որոշի տունը ծախելու տարբերակով մի կերպ սև իկրա գնել երեխեքի համար։ Կորոնավիրուսն ո՞ւմ շունն է, որ Նիկոլի գրպանին խփի ու ստիպի նրան տունը ծախելու հույսին մնալ։ Սամվել Ալեքսանյանը՝ Լֆիկ Սամոն, քանի կա, Նիկոլը տուն ծախելու հույսին չի մնա։

Բա լավ, եթե սև իկրայի պակաս չկա, ապա ինչո՞ւ է ծախում տունը։

Մարդիկ ընդհանրապես տունը մի քանի նպատակով են վաճառում՝

1․ եթե ուզում են ավելի լավը գնել,

2․ եթե փող չունեն և տեղափոխվում են համեմատաբար վատ բնակարան, իսկ հին ու նոր բնակարանների գների տարբերությունից առաջացած գումարը ծախսում են,

3․ եթե վարկի տակ են մնացել ու ստիպված ծախում են, որ, օրինակ, լվացքի մեքենայի վարկը մարեն,

4․ եթե հեղափոխականների սիրելի բուքմեյքերական կետերում պարտվել են ու պետք է փողը հասցնեն Նիկոլի ջրի շիշը բռնողի ընկերներին կամ Ալեն Սիմոնյանի ընկերների գրասենյակին,

5․ եթե շատ բնակարաններ ունեն և մեկը վաճառում են, որպեսզի փողը գործի մեջ դնեն,

6․ եթե արտագաղթում են։

Բնակարանը վաճառելու այլ պատճառներ էլ կարող են լինել, բայց հիմնականում սրանք են։ Իսկ երբ բնակարան է վաճառում գործող վարչապետը, որը կառավարական ամառանոցում տնից տուն է տեղափոխվում և թանկարժեք «ռեմոնտներ» անում՝ ի ուրախություն «հպարտ» քաղաքացիների, վերը նշված պատճառներին ավելանում են ևս մի քանիսը։

Եթե Նիկոլը տունը ծախում է, ապա նշանակում է, որ նա պատրաստվում է թռիչքի՝ վարչապետի աթոռից ինքնաթիռի աթոռ, ապա՝ հեռավոր երկրներ։ Թռիչքն այդ «ա լյա» Կերենսկի կարող է լինել։ Մնում է շորերի հարցը։

Կա նաև այլ տարբերակ։ Եթե Նիկոլը տունը ծախում է, ապա դրանով ուզում է ցույց տալ, որ երկար, ավելի ճիշտ՝ ցմահ է պատրաստվում մնալ կառավարական ամառանոցում, այսինքն՝ սոսնձվել վարչապետի աթոռին։ Եթե գործ ունենք այս տարբերակի հետ, ապա Նիկոլը շատ վատ հաշվարկող է, քանզի կարող է սեփական ընտանիքն առանց տուն թողնել։ Քանզի նա, մեղմ ասած, երկար չի մնալու վարչապետի աթոռին։ Թեև հանուն արդարության պետք է ասել, որ նա վարչապետությունից հետո եթե հաջողացնի ազատ քաղաքացու կարգավիճակում մնալ, ապա իր 3-րդ մասի բնակարանի պես հարյուրավոր բնակարաններ ձեռք բերելու հնարավորություն կունենա, քանզի վարչապետության շրջանում բարեգործ Լֆիկ Սամոն այնքան է հեղափոխական դարձել, որ Նիկոլը տուն գնելու համար փողի պակաս չի ունենա։

Ամփոփելով նկատենք, որ շատ անկապ պահ է ընտրել Նիկոլը բնակարանը վաճառելու համար։ Համ ճգնաժամ է ու հազիվ թե գնորդ գտնվի, համ էլ սա այն դեպքը չէ, որ գնորդին համոզես, թե բա «ժողովրդի» վարչապետի տունն է, ղսմաթով է, գնեք և շահեք։ Հատկապես որ որոշ ժամանակ անց տունն այդ ոչ թե ղսմաթով, այլ նաֆսված կարող է համարվել։

Ի դեպ, Նիկոլի տան վաճառքի պահով կա նաև այլ վարկած։

Կաշառքի մի տեսակ կա։ Էն որ շեֆին ուզում են փող տալ, բայց որպեսզի կոպիտ չստացվի և ամեն ինչ օրենքով լինի, գնում են նրան պատկանող որևէ գույք՝ շուկայականից բարձր գնով։ Ասենք ավտոմեքենա կամ բնակարան։ Ասելս այն է, որ պետք է ուշադիր լինել և հասկանալ, թե ով է գնելու այդ բնակարանը, արդյոք դա իրակա՞ն գնորդն է, թե՞․․․

Մի խոսքով, դժվար է հասկանալ Նիկոլի «բնակարանային» մոտիվացիան, բայց հաստատ կարելի է պնդել, որ նրան «էն գլխից» փչացրել էր բնակարանային հարցը։

Արեգնազ Մանուկյան