Մայիսի 19-ին հեռախոսազրույց է տեղի ունեցել ՌԴ արտգործնախարար Սերգեյ Լավրովի և Ադրբեջանի արտգործնախարար Էլմար Մամեդյարովի միջև: Այս մասին տեղեկացնում է minval.az կայքը` հղում տալով Ադրբեջանի արտգործնախարարության մամուլի ծառայությանը:

Նախարարները, համաձայն երկու երկրների նախագահների միջև տեղի ունեցած հեռախոսազրույցից հետո ստացած ցուցումների, քննարկել են Դաղստանի Հանրապետությունում Ադրբեջանի քաղաքացիների կուտակման խնդիրն ու այն քայլերը, որոնք պետք է ձեռնարկեն երկու երկրները այս խնդրի լուծման համար:

Կողմերը մտքեր են փոխանակել երկկողմ ռազմավարական հարաբերությունների զարգացման, այդ թվում ՝ առևտրատնտեսական կապերի ընդլայնման վերաբերյալ:

Նախարարները քննարկել են նաև Ղարաբաղյան հակամարտության կարգավորման հարցը:

Ադրբեջանի արտգործնախարարը ռուս գործընկերոջը տեղեկացրել է վերջերս տեսակոնֆերանսի ձևաչափով Մինսկի խմբի համանախագահների հետ ունեցած հանդիպման մասին:

Աղբյուրը՝ tert.am