Հյուսիսային Կորեայի ղեկավար Կիմ Չեն Ընը հայտարարել է, որ տան պայմաններում շուն պահելը կապիտալիստական ճոխության խորհրդանիշ է, և կարգադրել է, որպեսզի մայրաքաղաք Փհենյանում ընտանի բոլոր շներին հավաքեն:

Մինչդեռ կենդանիների տերերը մտավախություն ունեն, որ իրենց չորեքթաթ բարեկամներն իրականում օգտագործվելու են երկրում պարենի պակասը լրացնելու համար:

Ինչպես նշում է Daily Mail-ը, Կիմ Չեն Ընը հայտարարել է, որ այժմ երկրում շուն պահելը հակաօրինական է, քանի որ դա դիտարկվում է որպես բուրժուական գաղափարախոսության մաս:

Դրանից հետո իշխանությունները պարզել են այն հասցեները, որտեղ ընտանի շներ կան, ու տերերին ստիպում են հանձնել կենդանիներին կամ էլ ուժով առգրավում են: Այս մասին առաջինը տեղեկացրել է հարավկորեական Chosun Ilbo պարբերականը:

Հայտնի է, որ Հյուսիսային Կորեայում շան միսը շարունակում է նրբուտեստ համարվել, քանի որ մարդիկ հավատացած են, որ այն ուտողին էներգիայով է ապահովում:

Ըստ ՄԱԿ-ի տվյալների՝ Հյուսիսային Կորեայի 25,5 մլն բնակչության 60 տոկոսը սննդի պակաս ունի. իրավիճակն է՛լ ավելի են բարդացնում միջազգային տնտեսական պատժամիջոցները, տարերային աղետները:

Աղբյուրը՝ tert.am