Գյումրու տեխնոպարկի տնօրեն Գուրգեն Պարոնյանը հարուստ երևակայություն ունի: Նա հերթական, կարելի է ասել սենսացիոն հայտարարությունն է արել, նշելով, որ Գյումրիում  հիմնվելու  է   մուլտիմեդիայի լաբորատորիա, բացվելու է «Դելինք» ընկերության մասնաճյուղը, և հաշմանդամների համար սայլակներ են նախագծվելու,  գաղափարներն էլ վաճառելու են:

Հիշեցնենք,  որ մոտ 1 ամիս առաջ տեխնոպարկի ղեկավարությունը խոսում էր  ավիացիոն ծրագրերից : Գյումրիում նախագծելու են ինքնաթիռի մասեր և այդ գաղափարներն էլ վաճառելու են:

Հիմա էլ խոսում են մուլտիմեդիայի լաբորատորիայի մասին: Հայրաքաղաքում թողարկելու են  անիմացիոն ֆիլմեր, տեխնոքաղաքում այնպիսի խոշոր ընկերության գրասենյակ են բացելու, որից, Պարոնյանի խոսքերով, կա միայն Ռուսաստանում եւ Եվրոպայում: «Դելինք ընկերությունը մինչեւ ամառ կաշխատի  ու արտադրանք կթողարկի Գյումրիում»,- հավաստիացնում է տեխնոպարկի տնօրենը:

Սակայն նշենք, որ  առայժմ անգամ շենքի շինարարությունը չի սկսվել: Պարզվում է տեխնոպարկի շենքի  նախագծման հարցում թերություններ են ի հայտ եկել: Երբ դրանք կվերացվեն, մրցույթ կհայտարարվի եւ հաղթող ընկերությունը կսկսի շինաշխատանքները: Իսկ մինչ այդ քաղաքացիներին տեխնոպարկը առայժմ միայն զարմացնում է իր աներևակայելի նորարարություններով: Գուրգեն Պարոնյանը այսօր դարձյալ երաշխավորել է, որ ավիաշինության ծրագիրը Գյումրիում դեռ ուժի մեջ է:

Գյումրի