Այդ լուրերը համապատասխանում են իրականությանը, եղել են այդպիսի գաղտնալսումներ: Այս մասին, այսօր՝ հոկտեմբերի 1-ին, Դատավորների ընդհանուր ժողովի մեկնարկից առաջ լրագրողների հետ զրույցում նշեց Վերաքննիչ քրեական դատարանի դատավոր Մխիթար Պապոյանը՝ անդրադառնալով դիտարկմանը, որ ԱԱԾ-ն վերաքննիչ դատարանի մի շարք դատավորների է գաղտնալսել, այդ թվում իրեն:

«Մեծ հաշվով ուզում եմ հասկանալ, թե 2,5 տարի ձգվող գործն ինչ ելք է ունենալու: Բոլորովին վերջերս կասեցվեց այդ քրգործը, այնուհետեւ վերսկսվել է: Ինչ են քննում, ում վերաբերյալ են քննում, ինչու են այսքան երկար քննում, չեմ կարող պատասխանել: Ես համբերատար կսպասեմ, հետեւողական կլինեմ եւ իմ գնահատականը կտամ, երբ որ նախաքննության ավարտը կհայտարարվի: Կարծում եմ՝ բոլոր նրանք, որոնք առնչվել են, որոնք իմ սահմանադրական իրավունքը խախտել են, նրանք բոլորը պատասխան են տալու իրենց արած սխալի համար: Ընդ որում, բոլորի համար պարզ է, որ գաղտնալսումը եւ հեռախոսազանգերի վերծանումը ստանալը առանց դատարանի որոշման չի լինում: Գիտեմ, թե որ դատավորն է այդ թույլտվությունը տվել»,-ասաց նա:

Հարցին, թե մտավախություն չունի՞, որ անցանկալի դատավորներից իշխանությունը կփորձի ազատվել, նա պատասխանեց. «Ես բացարձակ որեւէ մտավախություն չունեմ, այդ թվում աշխատանքը կորցնելու: Այնուամենայնիվ, 40 դատավորի մասին որ խոսվում է նախարարի կողմից, արդեն տարիներ շարունակ է տարբեր դատավորների մասին տարբեր խոսակցություններ լինում: Ի վերջո, ես ուզում եմ հասկանամ, թե որտեղից է գալիս այդ խոսակցությունը, որ այս կամ այն դատավորը, որ հայտնվել են այդ ցուցակում ինչ են արել եւ ինչպես են իրենց դրսեւորում: Եթե դրանք օպերատիվ տեղեկություններ են, ինչու օպերատիվ մարմինը հետեւողականորն չի աշխատում: Եթե դրանք ուղղակի ասեկոսեների արդյունք են, ապա ասեկոսեների արդյունքում գնահատական տալ դատավորի աշխատանքին սխալ է: Եթե արդարադատության նախարարն իր աշխատասենյակում նստած ինչ-որ դատական ակտերին գնահատական տալով է գալիս այդպիսի եզրահանգման, դա մի խնդիր է, իսկ եթե օպերատիվ մարմինների կողմից տեղեկատվություն է, ինչու է դա հասնում նախարարին»:

Պապոյանը ընդգծեց, որ նախարար Կարեն Անդրեասյանն իր համակուրսեցին է, ինքը դրական վերաբերմունք ունի, հետեւաբար չի կարող ասել՝ նախարարն այդ հայտարարությունն անելիս ճիշտ է արել, թե սխալ. «Այնուամենայնիվ 3 տարի մենք անընդհատ լսում ենք, որ դատական համակարգում պետք է իրականացնել վեթինգ, որ այսքան տոկոսը սխալ է աշխատում, չպետք է աշխատի: Եթե դա իրականություն է, ապա ես կցանկանամ, որ այդ անձինք, որոնք թույլ են տվել սխալ, պատասխանատվության ենթարկվեն»:

Աղբյուրը` news.am