Հայաստանի և Ադրբեջանի միջև պետական սահմանի սահմանազատման հարցով հանձնաժողովը կարող է ստեղծվել մոտ ապագայում: Այս մասին «ՌԻԱ Նովոստի»-ին հայտնել է ՌԴ փոխարտգործնախարար Անդրեյ Ռուդենկոն:

Վերջինս հիշեցրել է, որ նոյեմբերի 26-ին Սոչիում Ռուսաստանի, Ադրբեջանի և Հայաստանի ղեկավարները պայամանավորվել են երկկողմ հանձնաժողով ստեղծելու մասին:

«Առաջնորդվում ենք այն հանգամանքով, որ դա տեղի կունենա առաջիկա ժամանակշրջանում: Որևէ անհաղթահարելի խոչընդոտ տվյալ պայմանավորվածության հաղթահարման ճանապարհին չենք դիտարկում»,-ասել է փոխնախարարը:

Ռուդենկոն հավելել է, որ հայ-ադրբեջանական սահմանի առանձին հատվածներում դեռևս մայիսից տեղի ունեցող իրավիճակի սրումից հետո Ռուսաստանը հանդես է եկել միջնորդի դերում՝ իր օգնությունն առաջարկելով համապատասխան բանակցային գործընթաց սկսելու հարցում:

«Նշեմ, որ նախադեպերն անմիջական առնչություն չունեն ռուս խաղաղապահների պատասխանատվության գոտու հետ: Խնդիրը որպես ժառանգություն հասել է խորհրդային ժամանակներից և պայմանավորված է երկու երկրի միջև պետական սահմանի միջազգային իրավական պատշաճ ձևակերպման բացակայությամբ»,-ասել է Ռուդենկոն:

Աղբյուրը՝ tert.am