ԱՄՆ նախագահ Ջո Բայդենը չի ծրագրում այցելել Ուկրաինա։ Այս մասին հերթական ճեպազրույցում հայտարարել է Սպիտակ տան մամուլի քարտուղար Ջեն Փսակին, գրում է ՏԱՍՍ-ը։

«Դա չի փոխվել... Նախագահը չի պատրաստվում գնալ»,-ասել է նա: Միաժամանակ, Փսակին նշել է, որ եթե պլանավորվի կազմակերպել ամերիկացի պաշտոնյաներից որևէ մեկի այցը Ուկրաինա, ապա Վաշինգտոնը, անվտանգության նկատառումներից ելնելով, չի ասի, թե կոնկրետ ով և երբ կմեկնի։

Նա հավելել է, որ ԱՄՆ-ն հանգստյան օրերին զենքով բեռնված չորս ինքնաթիռ է ուղարկել Ուկրաինա՝ 800 միլիոն դոլար ծավալով օգնության նոր փաթեթից, որի մասին օրերս հայտնել էր Բայդենը:

«Ես սա ասում եմ պարզապես ձեզ հասկացնելու համար, թե ինչ ջանքեր ենք գործադրում ավելի շատ օգնություն հասցնելու համար»,-նշել է ԱՄՆ նախագահի մամուլի քարտուղարը։

Փսակիի խոսքով՝ Բայդենը մերժել է ԱՄՆ Սենատում իր համախոհներից Քրիս Կունսի առաջարկը՝ զորքեր ուղարկել Ուկրաինա։

«Նախագահն առաջվա պես ծրագրեր չունի զորքեր ուղարկել Ուկրաինա՝ Ռուսաստանի դեմ պատերազմ մղելու համար: Նա չի կարծում, որ դա բխում է ազգային անվտանգության, ամերիկյան ժողովրդի շահերից», - ասել է Փսակին:

Ըստ խոսնակի՝ ԱՄՆ վարչակազմը կենտրոնացած է Կիևին ռազմական օգնության «պատմական ծավալ» տրամադրելու վրա՝ միաժամանակ նրան տնտեսական օգնություն տրամադրելով։

«Դա նաև ամրապնդում է ուկրաինացիների դիրքերը բանակցային սեղանի շուրջ: Եվ դրան զուգահեռ մենք ձևավորում ենք տնտեսական պատժամիջոցների պատմական փաթեթ, որն ունի կործանարար ազդեցություն Ռուսաստանի տնտեսության վրա: Իհարկե, մենք ուկրաինացիներին աջակցում ենք բոլոր հասանելի ձևերով, բայց նախագահը չի պատրաստվում պատերազմել Ռուսաստանի հետ»,-կարծում է Սպիտակ տան ներկայացուցիչը։

Աղբյուրը՝ tert.am