Առնվազն 19 երեխա և երկու մեծահասակ է զոհվել Տեխաս նահանգի Ուվալդե քաղաքի Ռոբի տարրական դպրոցում տեղի ունեցած հրաձգության հետևանքով, հայտնում է CNN-ը՝ վկայակոչելով պաշտոնական տվյալները։

Տեխասի նահանգապետ Գրեգ Էբոթը հայտնել է, որ կրակողը տեղի 18-ամյա բնակիչ Սալվադոր Ռամոսն է: Նա գործել է միայնակ՝ ձեռքին ունենալով ատրճանակ և, ենթադրաբար, ինքնաձիգ։ Դեպքի վայր ժամանած ոստիկանները սպանել են հարձակվողին։

Իրավապահ մարմիններում հեռուստաալիքի աղբյուրները հայտնել են, որ Ռամոսը դպրոց գնալուց առաջ կրակել է տատիկի վրա։ Տեխասի հանրային անվտանգության վարչությունը հայտնել է, որ կինը հոսպիտալացվել է ծանր վիճակում:

ԱՄՆ նախագահ Ջո Բայդենը միջադեպից հետո ամերիկացիներին կոչ է արել դիմակայել զենքի լոբբիին։ Բայդենը հիշեցրել է, որ 2012 թվականից ի վեր ԱՄՆ-ում ավելի քան 900 զանգվածային կրակոցներ են եղել։

***

Daily Mail պարբերականը մանրամասներ է ներկայացրել Տեխաս նահանգի Ուվալդե քաղաքի Ռոբի տարրական դպրոցում հրաձգություն իրականացրած և 19 երեխայի և երկու մեծահասակի կյանք խլած 18-ամյա Սալվադոր Ռամոսի մասին:

Նշվում է, որ համադասարանցիները Ռամոսին ծաղրել են հագուստի, ինչպես նաև այն փաստի համար, որ նրա ընտանիքն աղքատ էր: Համադասարանցիներից մեկի պատմելով՝ Ռամոսը գնալով ավելի ու ավելի քիչ էր դպրոց հաճախում, ինչը պայմանավորված էր դասընկերների ծաղրով:

Հայտնի է, որ ողբերգական հրաձագությունից չորս օր առաջ Ռամոսն իր ընկերոջը ինքնաձիգի ու փամփուշտների լուսանկար է ուղարկել: Ընկերոջ այն հարցին, թե ինչին է այդ ամենը պետք, Ռամոսը գրել է, որ չանհանգստանա:

Աղբյուրը մանրամասնում է, որ վերջերս Տեխաստ տեղափոխվախ երիտասարդը 18-ին երկու ինքնաձիգ է գնել:

Աղբյուրը՝ tert.am