Սեպտեմբերի 23-ին Լեռնային Ղարաբաղի Հանրապետության արտաքին գործերի նախարարի պաշտոնակատար Վասիլի Աթաջանյանն ընդունել է Ռուսաստանի Դաշնության Վոլգոգրադի մարզից մի խումբ հայ և ռուս երիտասարդների, ովքեր ԼՂՀ են այցելել «Ուղևորություն դեպի Հայաստան» նախագծի շրջանակներում:

Նախագծի ծրագրային տնօրեն, Վոլժսկի քաղաքում «Ռուսստանի հայերի միության» ներկայացուցչության ղեկավար Հրաչյա Ներսիսյանը նշել է, որ այցի նպատակն է ծանոթանալ Հայաստանի և Արցախի հոգևոր և պատմամշակութային արժեքներին, բարձրացնել երիտասարդության մտավոր ներուժի մակարդակը, նրա հոգևոր-բարոյական և հայրենասիրական դաստիարակությունը, կապեր հաստատել հայրենակիցների հետ:

Հյուրերի խնդրանքով ԼՂՀ ԱԳՆ ղեկավարի պաշտոնակատարը անդրադարձել է ղարաբաղյան ազգային-ազատագրական շարժման հիմնական փուլերին, ադրբեջանա-ղարաբաղյան հակամարտության կարգավորման բանակցային գործընթացում առկա ներկա իրավիճակին, հանրապետության ժողովրդագրական իրավիճակին և այլ հարցերի: Վասիլի Աթաջանյանը կարևորել է նման այցերը Հայաստան-Արցախ-Սփյուռք եռամիասնության ամրապնդման գործում:

Նախագծի կազմակերպիչները  տեղեկացրել են,  որ ապագայում ևս կշարունակվեն այցերը ԼՂՀ, որոնց կմասնակցեն ավելի մեծ թվով երիտասարդներ:

7or.am