Քաղաքական

25.04.2009 17:25


Հայաստանի Ռամկավար Ազատական կուսակցության հայտարարությունը

Հայաստանի Ռամկավար Ազատական կուսակցության հայտարարությունը

Կարեւորելով Հայաստանի ու նրա հարեւանների միջեւ բարի դրացիական հարաբերությունների անհրաժեշտությունը, որը պետք է նպատակաուղղված լինի տարածաշրջանում կայուն ու երկարատեւ խաղաղության հաստատմանը, միաժամանակ մեր անհամաձայնությունն ենք հայտնում հայ-թուրքական հարաբերությունների ձեւավորման ուղղությամբ մեր իշխանությունների վարած ներկայիս քաղաքականությանը: Դատելով գործընթացից` տպավորություն է ստեղծվում, որ սա ոչ թե երկու երկրների միջեւ փոխշահավետ հարաբերության սկիզբ է նախանշում, այլ նմանվում է գաղտնի գործարքի' թուրքական պետության ու Հայաստանի իշխանությունների միջեւ, որը, մեր կարծիքով, չի բխում Հայաստան պետության եւ աշխարհասփյուռ Հայ ժողովրդի շահերից:

Մտահոգ լինելով ստեղծված իրավիճակով ու մեր երկրի ապագայով`

        Հայաստանի Ռամկավար Ազատական կուսակցությունը հայտարարում է

1.  Հայաստանի Հանրապետությունը ի դմս նախագահի կամ արտաքին գերատեսչության պատասխանատուների, պարտավոր է ազգային կարեւորագույն հարցերում, մանավանդ Հայաստան-Թուրքիա հարաբերություններում ցուցաբերել համախորհուրդ  աշխատանքի պատրաստակամություն` հասարակական, քաղաքական, վերլուծական, հանրային կարծիքը ուսումնասիրող կազմակերպությունների հետ համատեղ գործելու:   Նմանատիպ աշխատաոճը հնարավորություն կընձեռի բաց ու անկաշկանդ միջավայրի ձեւավորման` պետություն-հասարակություն հարաբերություններում, ինչպես նաեւ հասարակության համաձայնությանը արժանացած ընդհանուր հայեցակարգի ձեւավորման` ուղղված տարիներով կուտակված հայ-թուրքական խնդիրների կարգավորմանը:

Ազգային կարեւորագույն հարցերի պատասխանատուների կողմից վերը նշված գործելաոճ որդեգրելու  պարագայում ՀՌԱԿ Քաղաքական խորհուրդը հայտնում է իր պատրաստակամությունը համատեղ աշխատանքի` մասնակից դարձնելով այս գործընթացին նաեւ սփյուռքի հնարավորությունները:

2. Ողջունելով Շվեյցարիայի արտաքին գործերի դաշնային դեպարտամենտի միջնորդական առաքելությունը, այնուամենայնիվ ՀՌԱԿ Քաղաքական խորհուրդը գտնում է, որ Հայաստան-Թուրքիա պետությունների հարաբերություններում մինչ օրս խորացող խնդիրների լուծումը գտնվում է ՄԱԿ-ի հովանու ներքո գործող Միջազգային Դատարանի տիրույթում, հետեւաբար, պահանջում ենք այս ժամանակահատվածում «սառեցնել» բոլոր տեսակի հարաբերությունները թուրքական կողմի հետ, քանի դեռ Հայաստանի Հանրապետությունը ձեռք չի բերել Միջազգային Դատարան դիմելու իրավունք:

3. ՀՌԱԿ Քաղաքական խորհուրդը վերահաստատում է ս.թ. մարտի 3-ին        տարածված հայտարարությունը` նրանում  զետեղված միջազգային իրավունքին ուղղված դրույթների այժմեականությունը եւ կոչ անում ՀՀ Ազգային ժողովին օրակարգային հարց դարձնել «ՄԱԿ-ի հովանու ներքո գործող Միջազգային Դատարանի իրավական գերակայության մասին»  օրենքի ընդունումը:

Ճանաչելով Միջազգային դատարանի գերակայությունը ՀՀ-ի կողմից, հնարավորություն կընձեռի միջազգային իրավունքի տեսանկյունից բոլոր տարածաշրջանային խնդիրների վերջնական լուծմանը հասնելու առավել կարճ ժամանակահատվածում, քան  որեւէ պետության կամ պետությունների միջնորդական առաքելության պայմաններում:

4. ՀՌԱԿ Քաղաքական խորհուրդը հայտնում է շնորհակալություն եւ ողջունում է պետական գործիչների հայտարարությունները ու բոլոր այն պետություններին, որոնք ճանաչել ու դատապարտել են 1915 -1923 թվականներին Հայ ժողովրդի հանդեպ թուրքական կառավարությունների իրականացրած Մեծ եղեռնը, սակայն միաժամանակ  գտնում ենք, որ մարդկության հանդեպ իրականացված  հանցագործության դատապարտումը առաջին հերթին անհրաժեշտ է հենց տվյալ պետությունների հասարակությանը, քանի որ  նմանատիպ զգացմունքային գործընթացներից աշխարհասփյուռ Հայ  ժողովուրդը բացի բարոյական հաղթանակից ուրիշ որեւէ իրավական` դատապարտող ու փոխհատուցող գործընթացի արդարացի լուծում չի ստանում:

5. ՀՌԱԿ Քաղաքական խորհուրդը կոչ է անում Հայ դատի հարցերով զբաղվող բոլոր հայկական կազմակերպություններին ե՛ւ Հայրենիքում, ե՛ւ սփյուռքում` որպես ռազմավարություն ընտրել հետեւյալ գործելաոճը.

-կենտրոնացնել ջանքերը` լոոբինգային եւ այլ հնարավորությունները Հայ Դատը Միջազգային Դատարան հասցնելու ուղղությամբ:     

                                   Հայաստանի Ռամկավար Ազատական կուսակցության

                                                              Քաղաքական խորհուրդ

                                                          Երեւան, 25 ապրիլի, 2009 թ.

Այս խորագրի վերջին նյութերը