Մեր հայրենիքի մի մասը՝ Արցախն իր 120․000 բնակիչներով, շարունակում է մնալ գերության մեջ։

Դեպի Արցախ բոլոր տեսակի հումանիտար փոխադրումների արգելափակումից հետո էլ ավելի է խորացել հումանիտար ճգնաժամը։

Սննդի, դեղորայքի, առաջին անհրաժեշտության պարագաների սակավությունը, գյուղատնտեսական աշխատանքներ կատարելիս քաղաքացիական անձանց ուղղված կրակոցները, գազամատակարարումից և էներգամատակարարումից շարունակաբար զրկելը պետք է ստանա իր համարժեք պատասխանը։

Իշխանությունների կողմից խաղաղության թեմաներով հանրությանը թմրեցնելու փորձերը չեն հաջողելու։ Վտանգված է ինչպես Արցախի, այնպես էլ՝ Հայաստանի գոյությունը։

Հայաստանի Հանրապետությունը պետք է կրկին ստանձնի Արցախի՝ անվտանգության երաշխավորը լինելու կարգավիճակը։

Հայկական երկու պետությունները թշնամուն կարող են դիմադրել միայն միասնականության և փոխօգնության պարագայում։

Աջակցությունս՝ այս ծանրագույն օրերին կամային հատկանիշներ ցուցաբերող սիրելի արցախցիներին։

Գառնիկ Դանիելյանի ֆեյսբուքյան էջից