Ադրբեջանական լրատվամիջոցները լուսանկարներ են հրապարակել Արցախի նախկին նախագահ Արայիկ Հարությունյանի ձերբակալությունից։ Հիշեցնենք, Արայիկ Հարությունյանի ձերբակալման մասին ադրբեջանական լրատվամիջոցները հայտնել էին նախօրեին։

Նշենք, որ Հարությունյանը ձերբակալվել է Ստեփանակերտում։

Ավելի վաղ Բաքուն հայտարարել էր, որ միջազգային հետախուզում է հայտարարվել Արցախի նախկին նախագահ Արայիկ Հարությունյանի և Պաշտպանության բանակի նախկին հրամանատար Ջալալ Հարությունյանի նկատմամբ։ Ադրբեջանի գլխավոր դատախազը հայտարարել էր, որ միջազգային հետախուզումը հայտարարվել է՝ Գյանջայի խաղաղ բնակչության դեմ հրթիռակոծությունների և 44-օրյա պատերազմի ընթացքում խաղաղ բնակիչների սպանությունների առնչությամբ։

Երեկ ավելի վաղ հայտնի էր դարձել, որ ձերբակալվել էին Արցախի նախկին նախագահներ Արկադի Ղուկասյանը, Բակո Սահակյանը և Ազգային ժողովի նախագահ, դաշնակցական Դավիթ Իշխանյանը:

Հիշեցնենք՝ օրեր առաջ Հայաստան մեկնելու ճանապարհին ադրբեջանական ուժերն առևանգել և գերեվարել էին Արցախի նախկին պետնախարար Ռուբեն Վարդանյանին, ՊԲ նախկին հրամանատար, գեներալ-լեյտենանտ Լևոն Մնացականյանին, ՊԲ հրամանատարի նախկին առաջին տեղակալ, գեներալ-մայոր Դավիթ Մանուկյանին։ Նրանք բոլորը գտնվում են Բաքվում և մեկ տասնյակն անցնող տարբեր շինծու մեղադրանքներով 4 ամսով կալանավորվել են։

Ադրբեջանական գերության մեջ է նաև Արցախի նախկին ԱԳ նախարար և նախագահի խորհրդական Դավիթ Բաբայանը, որին մոտ 20 հոդվածներով կեղծ մեղադրանքներ են ներկայացվել։ Նա հայտարարել էր, որ ինքնակամ պատրաստվում է գնալ Շուշի՝ ներկայանալու ադրբեջանական իրավապահներին, քանի որ դա պահանջել է Բաքուն՝ սպառնալով որ հակառակ դեպքում արցախցիների համար խնդիրներ կառաջանան։

Աղբյուրը՝ news.am