Մեծ Բրիտանիայում խորհրդարանը պաշտոնապես ցրվել է՝ կապված առաջիկա արտահերթ ընտրությունների հետ, ասվում է օրենսդիր մարմնի կայքում։

Գործող օրենքի համաձայն՝ խորհրդարանը պետք է ցրվի համընդհանուր ընտրություններից 25 աշխատանքային օր առաջ. արտահերթ ընտրությունները, վարչապետ Ռիշի Սունակի նախաձեռնությամբ, կանցկացվեն հուլիսի 4-ին, գրում է dw.com-ը:

Վերլուծաբաններն ակնկալում էին, որ դրանք տեղի կունենան աշնանը, սակայն կառավարությունը համաձայնության է եկել ավելի վաղ ժամկետի շուրջ: Սունակն անցյալ շաբաթ հայտարարել է, որ Մեծ Բրիտանիայի թագավոր Չարլզ Երրորդը բավարարել է խորհրդարանը ցրելու իր խնդրանքը։

Մեծ Բրիտանիայի խորհրդարանի լուծարումն ինքնաբերաբար նշանակում է, որ դրա Համայնքների պալատի բոլոր 650 տեղերը թափուր են դառնում: Ընտրություններից հետո՝ հուլիսի 9-ին, խորհրդարանը կհանդիպի նոր կազմով՝ խոսնակ ընտրելու և պատգամավորների երդման համար։

Նախորդ ընտրությունները տեղի են ունեցել 2019թ.: Այն ժամանակ Բորիս Ջոնսոնի գլխավորած Պահպանողական կուսակցությունը ջախջախիչ հաղթանակ է տարել: Սակայն այժմ իրավիճակն այլ է. սոցհարցումների տվյալները վկայում են Քեյր Սթարմերի գլխավորած Լեյբորիստական կուսակցության ժողովրդականության աճը։ Լեյբորիստները կարող են հաղթել 14 տարի ընդդիմություն լինելուց հետո: