Ինֆորմացիայի ազատության կենտրոնը ՀՀ Դատախազության հետ համատեղ մայիսի 2-3-ը «Տեղեկատվության և արտահայտվելու ազատությունները ՀՀ դատախազության համակարգում» թեմայով աշխատանքային քննարկում էր կազմակերպել լրագրողների  և դատախազների մասնակցությամբ։ Քննարկմանը ներկա էր նաև ՀՀ գլխավոր դատախազի տեղակալ Մնացական Սարգսյանը։

Քննարկումները ծավալվել են «Տեղեկատվությունն ու արտահայտվելու ազատությունները և անմեղության կանխավարկածը» և «Տեղեկատվությունն ու արտահայտվելու ազատությունները և նախաքննական գաղտնիքը» թեմաների շուրջ։

-Սա արդեն երկրորդ նման հանդիպումն է, երբ դատախազներն ու լրագրողները հանդիպում են և քննարկում են երկու կողմերին հուզող հարցեր։ Այս միջոցառման նպատակն է բարձրացնել դատախազության համակարգի հրապարակայնության մակարդակը և ակտիվացնել մամուլի և դատախազության համակարգի միջև երկխոսության մակարդակը,- «7օր»-ին ասել է Ինֆորմացիայի ազատության կենտրոնի նախագահ Շուշան Դոյդոյանը։

Նրա կարծիքով, «թե՛ լրագրողները, թե՛ դատախազության ներկայացուցիչները պետք է իրազեկ լինեն առաջին դեպքում, թե ինչպես այդ ինֆորմացիան ստանալ, երկրորդ դեպում՝ ինչպես այն տրամադրել»։ Նա նաև նշել է, որ նման հանդիպման նախաձեռնությունը հենց դատախազությանն է, ինչը շատ ողջունելի է։