«Գազ էլեկտրաէներգիայի դիմաց» ծրագիրը Հայաստանի և Իրանի միջև իրականացվող նմանատիպ երկրոդ համագործակցությունն է։ Այս մասին «7օր»-ին ասել է ՀՀ էներգետիկայի և բնական պաշարների նախարարության մամուլի խոսնակ Լուսինե Հարությունյանը։

Նախկին՝ «Փոխհոսքերի ծրագրի» համաձայն՝ ձմռան ամիսներին Հայաստանն Իրանից էլեկտրաէներգիա է վերցրել, իսկ ամռանը՝ մատակարարել Իրանին։

Երկրորդ ծրագրի համաձայն՝ Հայաստանն Իրանից գազ է ներկրում, որի դիմաց Իրան է արտահանում էլեկտրաէներգիա՝ փոխհամաձայնեցված ծավալներով և ռեժիմով։

-1 խմ գազի դիմաց տրվում է 3 կՎտ/ժ էլեկտրաէներգիա։ Սա երկու երկրների միջև կնքված տնտեսական գործարք է,- ասել է Լ. Հարությունյանը։

Նա հավելել է նաև, որ Իրան-Հայաստան գազամուղով ներկրվող գազն առայժմ Հայաստանի ներքին սպառման համար չի օգտագործվում։ Հետագայում էլ, նման հնարավորության դեպքում, դեռ պարզ չէ՝ Հայաստանն իրանական գազի դիմաց էլեկտրաէներգիայո՞վ կվճարի, թե՞ ոչ։