Հուշարձանագետ Սամվել Կարապետյանն այսօրվա ասուլիսին հայտնել է, որ Թբիլիսիի Սուրբ Նշան եկեղեցին «խոնարհված է, և շատ անելիքներ կան, որպեսզի այն վերականգնվի»։

–Վրաստանի իշխանությունների կողմից Սուրբ Նշան եկեղեցին չի դիտարկվել որպես պատմական հուշարձան, և դա է պատճառը, որ մինչ օրս մատնվել է անուշադրության,–ասել է հուշարձանագետը և ավելացրել,–Սուրբ Նշան եկեղեցին մինչ փլվելը երկու անգամ հրդեհվել է՝ նախ 2002թ–ին, ապա 2012թ–ին: Աղյուսաշեն շինությունների հրդեհները չեն մարվում ջրով, մարվում են ավազով կամ փրփուրով: Բայց երկու դեպքում էլ Սուրբ Նշանի հրդեհները մարվել են միմիայն ջրով, որը հանգեցրել է փլուզման։

Վրացական մամուլը գրել էր, որ Սուրբ Նշան եկեղեցու մի մասը փլվել էր անձրևներից հետ, սակայն հուշարձանագետը զարմանքով նշել է, որ անձրևից և երկրաշարժից հետո փլվում են միայն հայկական եկեղեցիները:

–Երկրաշարժ եղավ, ասացին՝ Շամփուրենցոց եկեղեցին երկրաշարժից մեկ օր անց փլվել է, հիմա էլ անձրևներից հետո Սուրբ Նշանն է փլվում: Ստացվում է, որ այդ բնական աղետների հետևանքով միայն հայկական եկեղեցիներն ու հուշարձաններն են վնասվում և փլուզվում, իսկ վրացական եկեղեցիները բախտավոր են,- ասել է բանախոսը։

7оr.am