Արցախի Հանրապետության Նախագահ Բակո Սահակյանը սեպտեմբերի 15-ին մասնակցել է Ստեփանակերտում մեկնարկած «Քաղաքական կուսակցությունները ժամանակակից ժողովրդավարական համակարգերում» կլոր սեղանի բացմանը եւ հանդես եկել ողջույնի խոսքով:Այս մասին տեղեկացնում են Արցախի Հանրապետության նախագահի աշխատակազմի տեղեկատվության գլխավոր վարչությունից:  Միջոցառմանը մասնակցում էին ԼՂՀ եւ ՀՀ խորհրդարաններում ներկայացված քաղաքական կուսակցությունները:

 Բակո Սահակյանը ողջույնի խոսքում ասել է.

«Ողջունում եմ «Քաղաքական կուսակցությունները ժամանակակից ժողովրդավարական համակարգերում» կլոր սեղանի բոլոր մասնակիցներին եւ գոհունակություն հայտնում Արցախում նման նշանակալի միջոցառման անցկացման կապակցությամբ: 

Քաղաքական կուսակցություններն այն կարեւորագույն ինստիտուտներից են, առանց որոնց անհնարին է պատկերացնել ժամանակակից ժողովրդավարական հասարակությունը: Նրանք հանդիսանում են նաեւ պետական համակարգի կենսագործունեության առանցքային բաղադրամասերից մեկը: Բնական է, որ ուժեղ ու կայացած կուսակցությունների առկայությունը, նրանց միջեւ քաղաքակիրթ հարաբերությունները, այդ թվում նաեւ մրցակցությունը, մեծապես նպաստում են երկրի առաջընթացին, ներքին եւ արտաքին քաղաքականության արդյունավետության բարձրացմանը:

Չափազանց կարեւոր է նաեւ կուսակցությունների դերը, նրանց սերտ համագործակցությունը համահայկական խնդիրների լուծման, հատկապես՝ Արցախյան հիմնախնդրի եւ Հայոց ցեղասպանության ճանաչման գործում: Դրանք այն հարցերն են, որոնք պահանջում են միասնական մոտեցում ու համախմբված աշխատանք: 

Արցախում ստեղծվել է բավականին նպաստավոր մթնոլորտ թե կուսակցությունների միջեւ կապերի խորացման, թե իշխանությունների հետ նրանց փոխգործակցության համար: Մենք դա համարում ենք մեծ նվաճում, ինչը պետք է պահպանել ու հետեւողականորեն զարգացնել:

Միեւնույն ժամանակ, անելիքներ նույնպես դեռ շատ ունենք: Անհրաժեշտ է, օրինակ, ընդլայնել միջկուսակցական կապերը Հայաստանի եւ Սփյուռքի քաղաքական ուժերի հետ, ինչը կհանդիսանա Հայաստան-Արցախ-Սփյուռք եռամիասնության ամրապնդման կարեւոր գործոններից մեկը: Մենք շահագրգռված ենք նաեւ այլ պետությունների քաղաքական կուսակցությունների հետ կապերի հաստատման եւ զարգացման մեջ:   

Այս տեսանկյունից «Քաղաքական կուսակցությունները ժամանակակից ժողովրդավարական համակարգերում» կլոր սեղանը կարող է ունենալ իր արժանի ներդրումը մեր պետության համար չափազանց կարեւոր գործընթացներում:

Վստահ եմ, որ միջոցառումը հաջողությամբ կիրականացնի իր առջեւ դրված խնդիրները: Բոլորիդ մաղթում եմ արդյունավետ աշխատանք ու ամենայն բարիք»: