«Նարեկացի» արվեստի միությունը «Ռոլան Բիկով» մանկապատանեկան ֆիլմերի 8-րդ միջազգային փառատոնի շրջանակներում այս տարի ևս իր հյուրընկալ հարկի տակ ընդունեց պատանի հանդիսատեսին:

Կինոյի և հեռուստատեսության զարգացման «Ռոլան Բիկով»  հայկական հիմնադրամը 2001 թվականից ի վեր նախաձեռնում է մանկապատանեկան ֆիլմերի ամենամյա փառատոն, որի նպատակն է իրականացնել տարաբնույթ մշակութային, սոցիալական և  կրթական ծրագրեր, խրախուսել հայ երիտասարդ կինոգործիչների ֆիլմերի ճանաչողության բարձրացմանը, ստեղծել կապեր համաշխարհային կինոգործիչների հետ, ինչպես նաև նպաստել երեխաների և  պատանիների անհատականության ձևավորմանը:

Հերթական անգամ,  ամենամյա կինոփառատոնը հոկտեմբերի 20-25-ին բացառիկ հնարավորություն  է ընձեռում հայ հանդիսականին դիտելու միջազգային մանկապատանեկան ֆիլմեր՝ պատմական, արկածային, անիմացիոն և այլ ժանրերում:

Դեռ ավելին, փառատոնային օրերին  նաև սպասվում են քննարկումներ, մամուլի ասուլիսներ, վարպետության դասեր, ստեղծագործական հանդիպումներ, ինչպես նաև հետաքրքիր անակնկալներ մանուկների ու պատանիների, ինչու չէ,  նաև նրանց ծնողների համար:

Փառատոնին մասնակից մանկապատանեկան ֆիլմերը ցուցադրվում են «Նարեկացի»  արվեստի միությունում, ինչպես նաև Մոսկվա կինոթատրոնում,  Մոսկվայի  տուն  մշակութագործարարական կենտրոնում, Գիտության և մշակույթի ռուսական կենտրոնում, ինչպես նաև Հայ-ռուսական սլավոնական համալսարանում:

Ֆիլմերի տոմսերը անվճար հիմունքներով տրամադրվում են դպրոցահասակ երեխաներին և պատանիներին:

Ինչպես նշեց փառատոնի կամավոր, միջազգային մանկապատանեկան ֆիլմերի թարգմանիչ  Անի Օհանյանը, փառատոնը բացառիկ հնարավորություն է ընձեռում կինոռեժիսորներին ինքնարտահայտվելու մանկապատանեկան ֆիլմերի լեզվով, իսկ պատանիներին՝ ակնդիր լինելու մրցանակակիր միջազգային ֆիլմերի  մի ամբողջ ընտրանու:

«Հայաստանում անիմացիոն ֆիլմերն ունեն բավականին մեծ պահանջարկ, ինչն ուրախալի է և փաստում է այն, որ  մեր երկիրը  մեծ քայլեր է անում մանկապատանեկան ֆիլմերի զարգացման և ճանաչողության բարձրացման ուղղությամբ»:

Նարեկացի արվեստի միություն
Հասարակայնության հետ կապերի բաժին