«a1plus.am»–ը փոխանցում է, որ Սերժ Սարգսյանի առանձնատուն տանող ճանապարհին հավաքված մոտ քառասուն քաղաքացիներ այսօր վաղ առավոտից նրան էին սպասում՝ ասելու, որ նա իր խոսքի տերը չեղավ:

«Ի՞նչ եք որոշել, հարգարժա՛ն նախագահ, դուք ինքներդ եք ասել ժամկետը՝ նոյեմբերի 1։ Խնդրում եմ ասել՝ ի՞նչ է փոխվել»,- Սերժ Սարգսյանին հարցնում է Արամի փողոցի բնակչուհի Սոնա Մաղաքյանը։

Սեպտեմբերի 27-ին ՀՀԿ գրասենյակի մոտ Սերժ Սարգսյանը Արամի և Եկմալյան փողացների նախկին բնակիչներին խոստացել էր մինչեւ նոյեմբերի 1-ը լուծել նրանց խնդիրները: Այս մարդկանց 8 տարի առաջ պետական կարիքների անվան տակ դուրս էին հանել իրենց տներից՝ խոստանալով նույն վայրում կառուցվող բազմահարկերում համարժեք փոխհատուցում տալ: Ինչևէ՝ մոտ մեկ ժամ սպասելուց հետո, Սերժ Սարգսյանն իր շարասյունով հայտնվեց, սակայն կանգ չառավ։

«Նա փախավ, չուզեց հանդիպել մեզ հետ, մեր նամակը վերցնել։ Արամի, Եկմալյանի ժողովուրդը արդեն 7 տարի փողոցում է մնացել»–վրդովված ասում է Արամի փողոցի բնակչուհի։

Զայրացած բնակիչները երթով շարժվեցին Սերժ Սարգսյանի նստավայր, սակայն նրանց այստեղ արդեն սպասում էր ոստիկաններից կազմված շղթան։ Բնակիչները, դժվարությամբ ճեղքելով ոստիկաններից կազմված շղթան, փորձեցին մոտենալ նստավայրին։ Ի տարբերություն նախարոդ օրերին, այսօր բնակիչները նույնիսկ չկարողացան մոտենալ Սերժ Սարգսյանի նստավայրի դարպասներին: Ոստիկանները նրանց թույլ չտվեցին։

«Մենք ամբողջ ձմեռ՝ այդ ցրտին ու սառնամանիքին, եկել ենք այստեղ ցույցերի, ոչ ոք մեզ չի լսել։ Հույս ունենք, որ գոնե մինչև ընտրությունները մի բանի կհասնենք»,-ասաց Եկմալյան փողոցի բնակչուհի Անուշիկ Գրիգորյանը։

Վրդովված բնակիչներին զսպելու համար նրանց մոտեցավ նախագահականի նամակների բաժնի աշխատակիցը եւ վերցրեց բողոքի ակցիայի մասնակիցների գրավոր բողոքը՝ խոսատանալով այն փոխանցել հասցեատիրոջը։