Դեկտեմբերի 6-ին Լեռնային Ղարաբաղի Հանրապետության արտգործնախարար Կարեն Միրզոյանն այցելել է Վաշինգտոնում Հայաստանի դեսպանատուն, որտեղ նա հանդիպել է ՀՀ դեսպան Թաթուլ Մարգարյանի և դեսպանության աշխատակցների հետ: Այս մասին տեղեկանում ենք ԼՂՀ ԱԳ նախարարության մամուլի ծառայության տարածած հաղորդագրությունից։

Հայ դիվանագետների հետ հանդիպումից հետո արտգործնախարար Միրզոյանը հանդիպել է Վաշինգտոնում գործող ամերիկահայ կազմակերպությունների եւ հոգևորականության ներկայացուցիչների հետ: Հանդիպման ընթացքում քննարկվել են ղարաբաղա - ադրբեջանական հակամարտության բանակցությունների ներկա փուլին առնչվող հարցեր: Նախարարը ներկայացրել է նաև երկրի համակողմանի զարգացումն ապահովելու ուղղությամբ Արցախի իշխանությունների կողմից ձեռնարկվող քայլերը:

Օրվա երկրորդ կեսին ԼՂՀ ԱԳ նախարարը մասնակցել է ղարաբաղյան հակամարտության կարգավորման թեմայով փակ քննարկմանը, որը կազմակերպել էր Միջազգային խաղաղության Կարնեգի հիմնադրամը` տարածաշրջանային փորձագետների, գիտնականների և Վաշինգտոնում գործող հետազոտական կենտրոնների ներկայացուցիչների մասնակցությամբ: