Մոսկվայում վարորդներն արտասովոր գործողություն են անցկացրել «Նշիր տեսախցիկը» անվանմամբ: Դա կազմակերպել են  մի խումբ նախաձեռնող վարորդներ, ովքեր դժգոհ էին, որ քաղաքի փողոցներում բացակայում են տեղեկատվական ցուցանակները, որոնք պետք է զգուշացնեին, որ խատումները  լուսանկարվում և տեսագրվում են:

Այդ վարորդները ոչ թե տեսախցիկներին են դեմ, այլ դրանց մասին նախազգուշացնող ցուցանակների բացակայությանը։ Այդ հանգամանքը կարող է ավտովթարի պատճառ դառնալ, քանի որ վարորդները միայն վերջին պահին են նկատում այդ նշանը: Նախաձեռնողները այդ նախազգուշացնող նշանները տեղադրել են  տեսախցիկից կես կիլոմետր առաջ` ելնելով օտարերկրյա փորձից, որտեղ դա պարտադիր պայման է:

Նոր տեղադրված նշանները, սակայն, դժվար թե մեկ շաբաթից ավելի կյանք ունենան։ Ինչպես մեկնաբանել է Ռուսաստանի ներքին գործերի նախարարության ճանապարհային երթևեկության վարչության պետի տեղակալ   Վլադիմիր Կուզինը, գոյություն ունի նշանների ցանկ՝  հաստատված բոլոր ճանապարհների համար, և դրանք բոլորը պետք է համապատասխանեն պետական չափորոշիչների պահանջներին: Ըստ նրա՝ նախաձեռնողների կախած նշանները անօրինական են և ավելի կարճ ժամանակում կհանվեն, քան տեղադրվել էին: