Այսօրվա ասուլիսին Գործատուների հանրապետական միության նախագահ Գագիկ Մակարյանն, անդրադառնալով գազի գնի հնարավոր թանկացումը մեղմելու համար պետության կողմից 30% սուբսիդավորման վերաբերյալ ՀՀ վարչապետ Տիգրան Սարգսկյանի հայտարարությանն ասել է, որ դա հարցի լուծում չէ։ «Մեր պետբյուջեն այդ հնարավորությունը չունի։ Մենք պետք է վերջին հաշվով հասկանանք, որ մեր տնտեսությունը մեծապես կախված է գազից, մենք պետք է խոսենք նոր աղբյուրների գործածության մասին, քանի որ այս թանկացումը լուրջ հետևանքներ կարող է ունենալ»,-ասել է բանախոսը։ Նա ընդգծել է, որ ի վերջո, բիզնեսին չի կարելի հանկարծակիի բերել, չի կարելի այսպիսի անակնկալներ մատուցել։ Բանախոսը նաև նշեց, որ այս ամենի արդյունքում ժողովրդի դժգոհությունն ավելանալու է՝ այսօր փոքր և միջին բիզնեսը գտնվում է շատ ցածր շահույթի մակարդակում և գնում դեպի փակուղի։
«Այս հարցում մի քանի ելք կարող է լինել, և եթե Ռուսաստանը մեզ պահում է ճնշված վիճակում, մեր ղեկավարությունը պետք է լուրջ քայլերի գնա։ Անընդհատ լսում ենք, որ մեր հանրապետությունը գտնվում է բանակցությունների փուլում Ռուսաստանի հետ, բայց ոչ ոք չի ասում, թե ինչ որոշեցին այդ բանակցությունների արդյունքում։ Եթե Ռուսաստանը համարյա թե առավելագույն գինն է սահմանել, ապա որտե՞ղ ենք մենք վրիպել, որ նման սանդղակներ են սահմանվել»–ասել է Գործատուների հանրապետական միության նախագահը։

7or.am