Հարցազրույց ճանաչված ռեժիսոր, դերասան, հրապարակախոս Աշոտ Ադամյանի հետ

-Ինչպե՞ս կմեկնաբանեք Արտակ Բուդաղյանի դեմ քրեական գործի հարուցումը։ Արդյոք սա անմեղին մեղավոր, իսկ մեղավորին անմեղ հռչակելու փորձ չէ՞:

-Իհարկե, ես հեռու եմ մտքից, որ այստեղ պետք է օրենքով ճիշտ քննում, զննում և արդարադադատություն իրականացնեն, որովհետև այն ձևով, ինչպես որ մեկնաբանվում է, ուղղորդվածությունը միանշանակ երևում է։ Բացի այդ՝ եթե այստեղ խնդիրն այն է, որ դատի առաջ պետք է կանգնեն այդ գործողության մասնակիցները, ապա այդ գործի քննության լիակատար բացահայտումից ես պետք է տեղյակ լինեմ, որովհետև տարբեր տեսակի լոլոներ ու հեքիաթներ լսելով՝ գործի մասին որևէ կարծիք կազմելը, իհարկե, սխալ է: Դա պետք է լինի հետաքննություն, որի մեջ ես համոզված չեմ. առայժմ իմ արդարադատությունը ինձ չի ապացուցել, որ ինքը կանգնած է արդարության կողքին:

Ես այնուամենայնիվ չեմ հավատում, որ այս գործը կքննվի ճշմարիտ և ճիշտ ձևով։ Ես չեմ սպասում դա, որովհետև անընդհատ տեսնում եմ, որ այս քրեական, մաֆիոզ իշխանության պահվածքում ժողովրդավար, արդար, մաքուր, ազնիվ գործընթացի որևէ միտում չկա:

-Կարծիք կա, որ այս ամբողջ ժամանակահատվածում Սուրիկ Խաչատրյանը եղել է իշխանության հենասյուներից մեկը, և այժմ ցանկանում են այդ հենասյունը պահպանել։ Սրա՞ մասին ինչ կասեք:

–Բնականաբար՝ սյունը կտրելը այդքան էլ հեշտ չէ։ Ես չգիտեմ՝ այս իշխանությունը քանի հենասյուն ունի, բայց որ Սուրեն Խաչատրյանը այդ հենասյուներից մեկն է, դա, ինչպես ասում են, ապացույցի կարիք չունի: Գնացեք Սյունիքի մարզ և հարցրեք, թե ով է եղել Սուրիկ Խաչատրյանը մինչև «հրաժարական» տալը:

-Սուրիկ Խաչատրյանը հայտարարել է, որ նախագահականում իր հետ խորհրդակցել են նոր մարզպետ նշանակելու հարցում: Ըստ ձեզ՝ նորմա՞լ է, որ իր անվան հետ առնչվող սպանության պատճառով հրաժարական տված մարզպետին` Սուրիկ Խաչատրյանին, հրավիրում են նախագահական՝ խորհրդակցելու ապագա մարզպետի նշանակման վերաբերյալ:

-Կապված նրա հետ, թե ինչպես հրաժարական տվեց Սուրեն Խաչատրյանը, որի իրավունքը չուներ (չէ որ նշանակված էր), այստեղ սկսվում է անհեթեթությունների մի հսկայական շարք` նրա հրաժարականը, նախագահական հրավիրելը, հետո ընդհանրապես նրա պահվածքը, կեցվածքը:

Եթե մենք գործ ունենք քրեական հանցագործության հետ, բոլոր նրանք, ովքեր մասնակցել էին, ամբողջ կազմով պետք է լինեին նախնական կալանքի տակ, և այստեղ էական չէ՝ Սուրեն Խաչատրյանը հրաժարական տվե՞լ է, թե՞ ոչ:

Զրույցը վարեց Կարեն Թովմասյանը