Լրահոս

25.07.2013 10:51


Վլադիմիր Շաքարով. «Տրանսպորտի թանկացման որոշումը հակասոցիալական է»

Վլադիմիր Շաքարով. «Տրանսպորտի թանկացման որոշումը հակասոցիալական է»

Ինչպես հայտնի է, տրանսպորտի թանկացման դեմ բողոքի գործողություններին մասնակցում են ոչ միայն երթուղայիններից օգտվողները, այլև բազմաթիվ ճանաչված մարդիկ և պարզապես անհատ վարորդներ, որոնց վրա ուղեվարձի բարձրացումը որևէ ազդեցություն չի գործել: Վարորդները իրենց մեքենաներով մոտենում են կանգառներին, բարձրաձայնում, թե որ ուղղությամբ են գնում և քանի մարդ կարող են իրենց հետ անվճար տեղափոխել: Ձեզ ենք ներկայացնում հարցազրույց նրանցից մեկի` Վլադիմիր Շաքարովի հետ:

–Դուք ձեր անձնական մեքենան ունեք և հասարակական տրանսպորտից չէք օգտվում։ Ի՞նչը դրդեց բողոքել ուղեվարձի բարձրացման դեմ և միանալ ակտիվիստների գործողություններին։ Քանի՞ օր է, որ միացել եք բողոքողներին։

–Գտնում եմ, որ տրանսպորտի թանկացման որոշումը հակասոցիալական է, և անկախ նրանից՝ դա իմ գրպանին դիպչում է, թե ոչ՝ լուրջ հարված է հասարակության սոցիալական իրավիճակին: Զուտ դա է պատճառը: Ակցիայի հենց առաջին օրը Գյումրիում էի, երբ լսեցի, որ նման նախաձեռնությամբ են հանդես եկել։ Ու որոշեցի Երևան վերադառնալուն պես միանալ: Մինչ այդ մտածում էի պարզապես կանգնեցնել ավտոմեքենաս և աշխատանքի տրանսպորտով գնալ՝ վճարելով ընդամենը 100 դրամ, բայց երբ բոյկոտից գործանական քայլերի անցնելու հնարավորություն ստեղծվեց, որոշեցի այս տարբերակով օգտակար լինել ուրիշներին:

–Երբ զրուցում եք այն մարդկանց հետ, ում աջակցում ու անվճար տեղափոխում եք, ինչ տպավորություն եք ստանում՝ իրենք սոցիալական պայմաններից դրդվա՞ծ են օգտվում անվճար մեքենաներից, թե՞ ուղղակի սկզբունքի հարց է:

–Հիմնականում նստում են ոչ թե սոցիալական պայմաններից դրդված, այլ ակցիային միանալու նպատակով, այսինքն նստողը գիտակցում է, որ նստելով մեքենան՝ նա դրանով իսկ աջակցում է ակցիային: Ես նաև նկատել եմ, որ բոյկոտին միանում է սոցիալապես ոչ այդքան խոցելի խավը, խոցելի խավը սովորաբար խուսափում է, որովհետև մտածում է՝ ամոթ է, հանկարծ չասեն՝ 150 դրամ չունի։ Ավելի շատ միջին խավն է ակտիվորեն միանում նման ակցիաներին:

Ներկայացրեց Կարեն Թովմասյանը

Այս խորագրի վերջին նյութերը