Արցախի քաղաքական կուսակցությունները, որպես Արցախի ժողովրդի քաղաքական մտքի և կամքի հիմնական արտահայտողներ, հավատարիմ մնալով  Արցախի անկախ պետականության սկզբունքներին, որոնք արտահայտվել են միջազգային ճանաչված չափանիշներով 1991 թվականի համաժողովրդական և 2006 թվականի Սահմանադրության ընդունման հանրաքվեներով, հաստատում են, որ ԼՂՀ-ի դուրս մղումը  բանակցային գործընթացից, ինչպես նաև ԼՂՀ փաստացի պետականության անտեսումը և հակամարտության հանգուցալուծման նկատմամբ խտրական մոտեցումների դրսևորումները, ներկա փուլում ձախողման են դատապարտել ադրբեջանա-ղարաբաղյան հակամարտության կարգավորման ջանքերը:

            Վերը նշված  հաստատումից ելնելով՝ մեկ անգամ ևս պահանջում ենք.

-        հարգել ԼՂՀ ժողովրդի ինքնորոշման իրավունքը՝ ապահովելով  ԼՂՀ-ի լիիրավ մասնակցությունը հակամարտության կարգավորման գործընթացին.

-       չխաթարել ԼՂՀ ժողովրդի անվտանգությունը, որի հիմնական երաշխիքը ԼՂՀ անկախ պետականությունն է ու ԼՂՀ Սահմանադրությամբ ամրագրված տարածքային ամբողջականությունը:

Մենք համոզված ենք, որ վերոհիշյալ պահանջները չիրականանալու դեպքում վտանգի է ենթարկվում մինչ այժմ խաղաղ պայմաններում ամրագրված տարածաշրջանային հավասարակշռությունը, որի խախտման հետևանքով ապագա ոչ ցանկալի զարգացումների ողջ պատասխանատվությունը  ընկնում է միջազգային հանրության և հատկապես ԵԱՀԿ Մինսկի խմբի համանախագահող երկրների ղեկավարության վրա:

            ԼՂՀ քաղաքական կուսակցությունները զորակցություն հայտնելով ԼՂՀ իշխանություններին և պաշտպանելով ԼՂՀ ԱԳՆ 2009 թվականի հուլիսի 15-ի հայտարարությունը, կոչ են անում Արցախի բնակչությանը ցուցաբերել միասնականություն վճռակամություն և զգոնություն:

«Ազատ Հայրենիք» կուսակցություն

Արցախի ժողովրդավարական կուսակցություն

«Արցախի Արմենական» կուսակցություն

ԼՂՀ կոմունիստական կուսակցություն

ՀՅԴ Արցախի կենտրոնական կոմիտե

«Շարժում-88» կուսակցություն

«Մեր տունը Հայաստանն է» կուսակցություն

16 հուլիսի, 2009-թ.

ք. Ստեփանակերտ