Սեպտեմբերի 3–ին Մոսկվայում կայանալիք Ռուսաստանի և Հայաստանի նախագահներ Վլադիմիր Պուտինի և Սերժ Սարգսյանի հանդիպման ընթացքում քննարկվելու են Մաքսային միության և Եվրասիական միության տիրույթի հետ Հայաստանի փոխգործակցության հեռանկարները: Այդ մասին հայտարարել է Ռուսաստանի նախագահի օգնական Յուրի Ուշակովը։
Նա նշել է, որ նախագահները քննարկելու են նաև ԼՂ հակամարտության կարգավորման գործընթացը, քաղաքական, առևտրա-տնտեսական, էներգետիկ և հումանիտար ոլորտներում փոխգործակցության հարցը, ինչպես նաև ՀԱՊԿ-ի շրջանակներում բազմակողմ համագործակցությանն առնչվող հարցեր։ «Ենթադրվում է, որ բանակցությունների առանցքային հարցերից կլինի նաև Անդրկովկասում անվտանգության և կայունության ապահովման թեման»,–«ՌԻԱ Նովոստի»–ի փոխանցմամբ՝ ասել է Ուշակովը։