Երեկ երեկոյան Նյու Յորքում տեղի է ունեցել «վեցնյակի» (Ռուսաստան, ԱՄՆ, Գերմանիա, Ֆրանսիա, Մեծ Բրիտանիա, Չինաստան) արտաքին գործերի նախարարների հանդիպումն Իրանի արտգործնախարար Մոհամմադ Ջավադ Զարիֆի հետ։

«ԻՏԱՌ-ՏԱՍՍ»–ի փոխանցմամբ՝ Զարիֆն առանձին բանակցություններ է վարել նաև ԱՄՆ պետքարտուղար Ջոն Քերիի հետ։

Մամուլի ասուլիսին Իրանի ԱԳ նախարարը դրական է գնահատել ԱՄՆ իր գործընկերոջ հետ հանդիպումը՝ հույս հայտնելով, թե մոտ ապագայում Իրանի ներկայացրած փաստերը թույլ կտան միջազգային հանրությանը համոզվել, որ Իրանի միջուկային ծրագիրը բացառապես խաղաղ բնույթ ունի:

Իրանի հետ բանակցությունները դրական են գնահատել նաև Քերին և «վեցնյակի» մյուս ԱԳ նախարարները: