ԱԺ «Հայ ազգային կոնգրես» խմբակցության ղեկավար Լևոն Զուրաբյանը ՀՀ և ՌԴ կառավարությունների միջև ստորագրված գազային համաձայնագրերը համարում է պետական դավաճանությանը հավասար գործարք: ԱԺ այսօրվա արտահերթ նիստի ժամանակ նա ՀՀ էներգետիկայի և բնական պաշարների նախարար Արմեն Մովսիսյանից հետաքրքրվել է՝ ինչո՞ւ եք խախտել ՀՀ սահմանադրությունը, ինչո՞վ կարող եք արդարացնել պետական դավաճանությանը համարժեք այդ համաձայնությունը, ինչո՞ւ է ոտնահարվում ՀՀ ողջ օրենսդրությունը:

–Դուք, իհարկե, կարող եք 7 անգամ կրկնել, որ որևէ օրենք չեք խախտել, բայց մենք փաստարկված ենք խոսում: Դուք չեք կարող հերքել, որ օրենք եք խախտել,-ասել է Լ. Զուրաբյանը:

ՀԱԿ խմբակցության քարտուղար Արամ Մանուկյանն էլ դիմել է խորհրդարանի ղեկավարությանը և քաղաքական մեծամասնությանը:

–2008–ից սկսած` ստորագրվել է 22 արձանագրություն. մինչև չկարդաք, այս քվեարկությունը չանե՛ք: Այնտեղ կան բաներ, որ դուք էլ չգիտեք,-ընդգծել է Ա. Մանուկյանը:

Սակայն երբ ՀՀ ԱԺ նախագահ Հովիկ Աբրահամյանը նախարարից հետաքրքրվել է, թե խոսքը ի՞նչ արձանագրությունների մասին է, Ա. Մովսիսյանը պատասխանել է.

–Չգիտեմ։

7or.am