Սիրիական զորքերն իրենց վերահսկողության տակ են վերադարձրել զինյալների կողմից գրավված բարձունքները Թուրքիայի հետ սահմանին։ Ինչպես հայտնել է «Ալ–Վաթան» լրատվական ծառայությունը, օդուժը և հրետանին հզոր հարվածներ են հասցրել հակառակորդի դիրքերին Քեսաբ քաղաքի մոտակայքում՝ Լաթակիայից 65 կմ դեպի հյուսիս, որտեղ գտնվում է սահմանային երկու անցակետ։

«Ալ–Վաթանի» տվյալներով՝ զինյալների բազան գտնվում է անտառալեռնային շրջաններում՝ Քեսաբի և Սալմիի շուրջ՝ Լաթակիայից արևելք։ Սիրիական հրետանին կրակ է բացել նրանց դիրքերով։ Անցած օրվա ընթացքում թշնամական ուժերը ավելի քան 200 մարդ են կորցրել։ Ռազմաճակատի այս հատվածում կառավարական ուժերի դեմ պայքար են մղում ծայրահեղական «Ջեբհաթ ան–նուսրա» խմբավորումը և «Իսլամական ճակատը»՝ կազմված հիմնականում օտարազգի վարձկաններից։ Աղբյուրի փոխանցմամբ՝ գրոհայինների թիվը կարող է հասնել մինչև 5 հազարի։

Տեղեկացնում է «ԻՏԱՌ–ՏԱՍՍ»–ը։