Խորհրդարանական ոչ իշխանական քառյակը նախորդ շաբաթ հայտարարեց կուսակցությունների ղեկավարների մակարդակով հանդիպման հավանականության մասին: Տիգրան Սարգսյանի գլխավորած կառավարության հրաժարականից հետո «Ժառանգությունը» կրկնեց ղեկավարների հանդիպման անհրաժեշտությունը: ՀԱԿ փոխնախագահ Լեւոն Զուրաբյանը iLur.am-ի հետ զրույցում վերահաստատեց հանդիպելու պատրաստակամությունը՝ հիշեցնելով, որ Կոնգրեսն ի սկզբանե համաձայն է եղել այդ ֆորմատով հանդիպմանը:

iLur.am-ը հնարավոր հանդիպման ժամկետների եւ օրակարգի շուրջ մեկնաբանություն վերցրեց ԲՀԿ խմբակցության անդամ Ստեփան Մարգարյանից:

-Պարո՛ն Մարգարյան, կուսակցությունների ղեկավարների հանդիպման ուղղությամբ գործնական քայլեր արվո՞ւմ են:

-Մենք հայտարարել ենք, որ խնդիր չունենք. պատրաստ ենք հանդիպմանը: Առայժմ հայտնի չէ, թե այն երբ կկայանա: Բայց մենք պայմանավորվածություն ունենք, որ քառյակի առաջիկա նիստի հիմնական քննարկելիք հարցերից մեկն այդ է լինելու: Հանդիպման անհրաժեշտությունը պնդում են «Ժառանգության» մեր գործընկերները. Կոնգրեսը պատրաստ է, մնում է՝ հաջորդ նիստին Դաշնակցության հետ էլ խոսենք:

-Քառյակի նիստը ե՞րբ կկայանա: Հաշվի առնելով հավանականությունը, որ ՀՀԿ-ն հինգշաբթի վարչապետի թեկնածուի անունը կհայտարարի, քառյակը շտապելու խնդիր չունի՞:

-Քառյակի նիստը շատ չի ուշանա, հստակ չեմ կարող ասել, բայց կարծում եմ՝ այսօր-վաղվա խնդիր է: Վստահաբար, դա չի կարող լինել, ասենք, հաջորդ շաբաթ. կլինի ավելի շուտ:

-Ո՞րն է լինելու չորս ուժերի ղեկավարների հնարավոր հանդիպման օրակարգը:

-Օրակարգը շատ բազմազան է լինելու, որովհետեւ երկիրը կանգնած է բազմաթիվ խնդիրների առաջ, եւ, փաստորեն, գտնվում ենք նոր կառավարության ձեւավորման նախաշեմին: Կարծում եմ, որ այդ «մեծ» հանդիպման օրակարգային որոշ հարցեր եւս քառյակի նիստում պետք է համաձայնեցնենք:

Աղբյուրը՝ ilur.am