«Ազատություն» ռադիոկայանի փոխանցմամբ՝ Ուկրաինայի արևելքում առաջիկա ժամերին հնարավոր է՝ ռազմական հատուկ գործողություն սկսվի։ Առավոտյան ժամը 10-ին սպառվել է գրաված վարչական շենքերն ազատելու և զենքը վայր դնելու ռուսամետ բողոքի ցույցերի մասնակիցներին Կիևի ներկայացրած վերջնաժամկետը:

Ուկրաինայի ազգային անվտանգության և պաշտպանության խորհուրդը որոշում է կայացրել լայնամասշտաբ հակաահաբեկչական գործողություն սկսել։

Հիշեցնենք, որ երկրի հարավ-արևելքի մի քանի քաղաքներում զինված մարդիկ շաբաթ և կիրակի օրերին գրավել են վարչական շենքեր: Կիրակի Մայդանի աջակիցների և հակառակորդների հանրահավաքներ են անցկացվել Զապորոժիեում, Լուգանսկում, Օդեսայում և Խարկովում: Բախումների ժամանակ վիրավորվել է առնվազն 50 մարդ։