Քաղաքական

24.04.2014 15:20


Երվանդ Բոզոյան. Սերժ Սարգսյանի քայլերը Հայաստանի պետական շահերի հետ ոչ մի կապ չունեն

Երվանդ Բոզոյան.  Սերժ Սարգսյանի քայլերը Հայաստանի պետական շահերի հետ ոչ մի կապ չունեն

Քաղաքագետ Երվանդ Բոզոյանը կարծում է, որ Էրդողանի հայտարարությամբ Թուրքիան փորձում է չեզոքացնել ցեղասպանության 100-ամյակի հետ կապված խնդիրները:

«Թուրքիան փորձում է ինչ-որ կիսախոստովանական հայտարարություններով մեղմացուցիչ հանգամանք ստեղծել: Սա է խնդիրը»,- ասաց Երվանդ Բոզոյանը:

Հարցին` արդյոք Էրդողանի այս հայտարարությունը հայ-թուրքական արձանագրությունների անմիջական հետևանքը չէ՞, քաղաքագետը միանշանակ ասաց, որ Էրդողանի հայտարարությունն այդ արձանագրությունների հետևանքն է:

«Այդ արձանագրությունները ցույց են տալիս, որ Հայաստանի հետ Թուրքիան իբր բանակցային գործընթացի մեջ է: Ի վերջո նրանք կարողացան 100-ամյակի հետ կապված ալիքը չեզոքացնել: Այդ արձանագրություններից հետո ոչ մի երկիր չի ճանաճել Հայոց ցեղասպանությունը: Մինչև Սերժ Սարգսյանի իշխանության գալը ավելի քան տասնյակ երկրներ ճանաչել էին ցեղասպանությունը: Տխրահռչակ արձանագրությունները միանշանակ հսկայական վնաս տվեցին հայոց ցեղասպանության ճանաչման գործընթացին»,- ցավով նկատեց քաղաքագետըˋ հավելելով, որ Էրդողանի կիսախոստովանական հայտարարությունները ոչ մի կապ չունեն Հայաստանի ազգային շահերի հետ:

Ըստ Երվանդ Բոզոյանի՝ Հայաստանի պետական շահերը պարտադրում էին, որ Սերժ Սարգսյանը վաղուց հետ կանչեր այդ արձանագրությունները, որովհետև դա խանգարում է Հայաստանին և երկխոսության իմիտացիա է ստեղծում:

«Այս արձանագրություններից Թուրքիան շահում է ամեն ինչ, իսկ Հայաստանը միայն կորուստ է ունենում: Այս իշխանություններն Արևմուտքում իրենց իմիջի բարձրացման համար Հայաստանի պետական շահերն են ոտնահարում»,- ասաց քաղաքագետը:

Բոզոյանի խոսքով՝ Սերժ Սարգսյանի քայլերը ռացիոնալ դաշտում հնարավոր չէ գնահատել. «Այդ մարդու քայլերը Հայաստանի պետական շահերի հետ ոչ մի կապ չունեն: Նրա քայլերը պայմանավորված են բացառապես սեփական իմիջային խնդիրներով»:

Քրիստինա Աղալարյան

Նյութի աղբյուրը ` Newsbook.am

Այս խորագրի վերջին նյութերը