2009թ. սեպտեմբերի 1-ին ՀՀ նախագահ Սերժ Սարգսյանը, ԱԳՆ կենտրոնական ապարատի և Հայաստանի դիվանագիտական ներկայացուցչությունների ու հյուպատոսական հիմնարկների ղեկավարների հավաքին իր խոսքում, անդրադարձ է կատարել վիրահայությանն ու ջավախքահայությանը հուզող խնդիրներին, ասելով, մասնավորապես, հետևյալը. «Մենք պետք է լուրջ ջանքեր գործադրենք վիրահայությանը հնարավոր աջակցություն ցույց տալու համար: Ջավախքի նկատմամբ մեր վարած քա­ղաքականության տրամաբանությունը, բովան­դակային առումով, պետք է բխի ,ինտեգրում առանց ձուլմանե սկզբունքից: ...Կարծում եմ, որ հայերենը Վրաս­տա­նում մարզային լեզու ճանաչելու, Հայկական առաքելական սուրբ եկե­ղեցու գրան­ցումն ապահովելու, Վրաստանի հայ­կական հուշարձանների պահ­պան­մանն ուղղ­ված քայլերը Վրաստանում միայն նպաստելու են հայ-վրա­ցական բարեկամության ամրապնդմանը, փոխվստահության մթնոլորտի խո­րաց­մանը: Այս բոլոր հարցերում մենք պետք է լինենք նրբա­նկատ, բայց հետևո­ղական և սկզբուն­քային»:

«Երկիր» միությունը ողջունում է ՀՀ նախագահի արտահայտած դիրքորոշումը ջավախքահայությանը և վիրահայությանը հուզող հիմնական խնդիրների նկատմամբ' գնահատելով այն որպես պարզ և հստակ: Կարելի է նշել, որ ՀՀ նախագահի խոսքերն էլ ավելի մեծ կշիռ և նշանակություն են ստանում այն հանգամանքի բերումով, որ դրան հնչեցվել են Վրաստանի արտգործնախարարի Երևան կատարվելիք այցի նախօրյակին:

«Երկիր» միությունը նաև արձանագրում է, որ ՀՀ նախագահի կողմից առաջարկված քայլերն ուղղակիորեն համահունչ են մի շարք միջազգային (միջկառավարական) կազմակերպությունների, այդ թվում' ՄԱԿ-ի մարդու իրավունքների հանձնաժողովի և Եվրախորհրդի, ինչպես նաև' հեղինակավոր ոչ-կառավարական կազմակերպությունների կողմից Վրաստանի կառավարությանն ուղղված կոնկրետ հանձնարարականներին:

«Երկիր» միությունը կոչ է անում Վրաստանի իշխանություններին' ևս ճանաչել երկրի հայ բնակչության առջև ծառացած լեզվա-կրթական, կրոնական և մշակութային խնդիրների առկայությունը, ինչպես նաև' գործուն քայլեր ձեռնարկել դրանք լուծելու ուղղությամբ' կիրառելով մեխանիզմներ, որոնք կհամապատասխանեն էթնիկական փոքրամասնությունների պաշտպանության ոլորտում Վրաստանի կառվարության կողմից ստանձնած միջազգային պարտավորությունների տառին և ոգուն: