«Associated press» գործակալությունը հայտնում է, որ ամերիկյան սահմանային ծառայության աշխատակիցները Մեքսիկայի հետ սահմանի մոտ հայտնաբերել են 670 մետրանոց ստորգետնյա թունել, որը մաքսանենգները օգտագործում էին թմրանյութերի փոխադրման համար, և բռնագրավել են 20 տոննա մարիխուանա։

Ներգաղթողների և մաքսային ոստիկանության ներկայացուցիչ Մայք Ունցուեթի խոսքերով՝ օդափոխման համակարգով և ռելսերով ապահովված թունելը ձգվում է մեքսիկական Թիհուանա քաղաքի արևելյան մասի սեփական տնից մինչև ամերիկյան Սան-Դիեգո քաղաքի պահեստը։

Հաղորդագրության մեջ ասվում է, որ ներկայումս թմրանյութերի մաքսանենգության կազմակերպման կասկածանքով ԱՄՆ-ում 3, իսկ Մեքսիկայում 5 մարդ է ձերբակալվել։

Սա արդեն այս ամսվա ընթացքում մեծ թունելների հայտնաբերման երկրորդ դեպքն է։ Նոյեմբերի 2-ին ամերիկացի սահմանապահները Սան-Դիեգո շրջանում հայտնաբերել էին 600 մետրանոց 20 տոննա մարիխուանայով մեկ այլ ստորդետնյա թունել։