Հայաստանի Հանրապետությունում սուր շնչառական վարակների և թոքաբորբերի առումով համաճարակային իրավիճակը համեմատաբար հանգիստ է:

Ներկայումս հանրապետության ողջ տարածքում իրականացվում է սուր շնչառական վարակների օրական մոնիտորինգ:

Մոնիտորինգի տվյալներով' սուր շնչառական վարակներով հիվանդացությունը, 2009 թվականի նույն ժամանակահատվածի համեմատ, գտնվում է միևնույն մակարդակի վրա:

Կազմակերպված և իրականացված լաբորատոր հետազոտությունների արդյունքում պարզվել է, որ ներկայումս հանրապետությունում հիմնականում շրջանառում է գրիպի վիրուսի B տեսակը:

2011 թվականին, 2010 թվականի միևնույն ժամանակահատվածի համեմատ, նվազել են հանրապետության հիվանդանոցներ հոսպիտալացված թոքաբորբերի դեպքերը: Վերակենդանացման բաժանմունքներ հոսպիտալացվել է թոքաբորբի մեկ դեպք:

Սկսած 2010 թվականի հոկտեմբերից' հանրապետության դպրոցներում և նախադպրոցական կազմակերպություններում իրականացվում է ջերմային ռեժիմի մոնիտորինգ:

Պարզաբանվում են բացակայության պատճառները, իսկ հիվանդացության բարձրացման դեպքում իրականացվում են կանխարգելիչ միջոցառումներ:

Շարունակելով սուր շնչառական վարակների կանխարգիչ միջոցառումները, ինչպես նաև դրանցից խուսափելու համար' ՀՀ առողջապահության նախարարությունն առաջարկում է.

   • խուսափե´լ հիվանդների հետ շփումից,

   • եթե հիվանդ եք, ապա մնացե´ք տանը,

   • եթե հիվանդ եք, հրավիրեք տեղամասային մանկաբույժին, թերապևտին կամ ընտանեկան բժշկին, մի´ զբաղվեք ինքնաբուժմամբ,

   • հագնվե´ք եղանակին համապատասխան,

   • պահպանե´ք հազի և/կամ փռշտալու վարվելակարգը,

   • օգտագործե´ք հնարավորինս շատ հեղուկ,

   • հաճախակի օդափոխե´ք փակ տարածքները: