ԱԺ–ն շարունակում է քննարկել «Ընտրական օրենսգրքում» փոփոխություններ կատարելու նախագիծը, որով ոչիշխանական «եռյակն» առաջարկում է անցնել 100% համամասնական ընտրակարգին և հրապարակել քվեարկածների ցուցակները։

Իր ելույթում ԲՀԿ խմբակցության պատգամավոր Ստեփան Մարգարյանը նշել է, որ մեծամասնական ընտրատարածքներում քվեարկության ընթացքին պետական համակարգը միջամտել է:

–Ամբողջ պետական համակարգը` սկսած ոստիկանությունից և այլ պետական, տեղական իշխանություններով, գործում է կոնկրետ այն թեկնածուի օգտին, որն ունի իշխանության «դաբրոն»: Մեծամասնական համակարգը մեր երկրում ունի այդ արատավոր երևույթները։ Սա նաև գտնվում է 12 կետերի շրջանակներում,–ասել է Ս. Մարգարյանը։– Իշխանությունները կողմնորոշվելու խնդիր ունեն։ Մեկը ասում է՝ եկեք խոսենք, մյուսն ասում է՝ Կառավարությունն անդրադառնալու է, մեկն ասում է՝ եկեք խոսենք, բայց չենք անելու: Եթե չեք անելու, ինչի՞ մասին ենք խոսելու: Զրուցակցի պակա՞ս ունեք: Ի վերջո, այս 12 կետերը վերջին հանրահավաքներից հետո այլևս մերը չեն. դա քաղաքական ուժերի խնդիրը չէ, դա հասարակությունը վերցրել է, գոնե հասարակության այն ակտիվ հատվածը, որը 40-50 հազարով հրապարակում կանգնած էր: Երկխոսությունը պետք է նրա հետ լինի։
Նա նաև հավելել է, որ հասարակության կարծիքն այն է, որ ԱԺ–ում ներկայացված քաղաքական ուժերի դասավորվածությունը չի համապատասխանում հասարակության տրամադրություններին:

–Եկեք մի անգամ քաղաքական կամք ցուցաբերենք և մի անգամ փորձենք իշխանություն ձևավորել։ Անշուշտ, մենք իլյուզիաներ չունենք, որ հիմա մեծամասնությունը քվեարկելու է,–հավելել է ԲՀԿ–ական պատգամավորը:

7or.am