Սեպտեմբերի 25-ին Ազգային ժողովի փոխնախագահ Սամվել Նիկոյանը հանդիպեց Հարավային Կովկասի հարցերով Եվրամիության հատուկ ներկայացուցիչ, դեսպան Պիտեր Սեմնեբիի հետ: Հանդիպմանը ներկա էին ՀՀ-ում Եվրոպական հանձնաժողովի պատվիրակության ղեկավար, դեսպան Ռաուլ դե Լուցենբերգերը,  ՀՀ-ում Լիտվայի Հանրապետության արտակարգ և լիազոր դեսպան Գիեդրիուս Ապուոկասը, Հարավային Կովկասում ԵՄ հատուկ ներկայացուցչի քաղաքական հարցերով խորհրդական Անդրեյ Դիդենկոն, ԵՄ հատուկ ներկայացուցչի քաղաքական հարցերով խորհրդական Մարկ Ֆոսեթը:

Ս. Նիկոյանը հյուրերի խնդրանքով ներկայացրեց 2008 թվականի մարտի 1-2 Երևան քաղաքում տեղի ունեցած իրադարձությունների և դրանց պատճառների ուսումնասիրության ժամանակավոր հանձնաժողովի կատարած աշխատանքները,   զեկույցի հիմնական ուղղվածությունը և    խնդրին առնչվող ընթացիկ աշխատանքների վերաբերյալ իր նկատառումները:

Սամվել Նիկոյանի գնահատմամբ՝ զեկույցը ավելի մեղմ ընդունվեց, քան ինքը սպասում էր, ինչը  պայմանավորված է մի շարք գործոններով, իսկ հիմնական պատճառն այն է, որ  հանձնաժողովն անաչառ գտնվեց տեղի ունեցած բռնությունների, ոստիկանության գործողությունների իրավաչափության և համաչափության ուսումնասիրության հարցերում,   իր առջև դրված խնդիրները հիմնականում լուծեց և տվեց հստակ  պատասխաններ:
Հանձնաժողովը փաստերը քննելիս միշտ հիմնվել է կոնկրետ աղբյուրների վրա՝ զերծ մնալով կամայական մեկնաբանություններից ու եզրակացություններից: Ահա թե ինչու առայժմ ոչ մի փաստարկված քննադատություն չկա ոչ իշխանական և ոչ էլ ընդդիմադիր թևից: Հանձնաժողովը իրադարձությունների կրկնումը բացառելու նպատակով զեկույցում քաղաքական, իրավական, սոցիալ-տնտեսական և այլ լուծումների վերաբերյալ առաջարկներ է ներկայացրել, որոնց կատարման ընթացքին հետևելու նպատակով անհրաժեշտ է համարել ստեղծել մոնիտորինգի խումբ: Հանձնաժողովը կարևորելով մեղավորների հայտնաբերումը, միաժամանակ ապագային ուղղված առաջարկներ  է արել  երկրում առկա սոցիալ-տնտեսական ու քաղաքական իրավիճակը շտկելու և  նման ողբերգական իրադարձությունները բացառելու նպատակով:

Ս.  Նիկոյանը տեղեկացրեց, որ շուտով ամբողջ զեկույցը կթարգմանվի անգլերեն և կուղարկվի  միջազգային կազմակերպություններին և հույս հայտնեց, որ նրանց կարծիքը զեկույցի վերաբերյալ կլինի  օբյեկտիվ ու անաչառ:

Պ. Սեմնեբին շնորհակալություն հայտնեց տեղեկատվության, կատարված  համապարփակ ու մանրակրկիտ աշխատանքի համար՝ բարձր գնահատելով  զեկույցի կանխարգելիչ նշանակությունը:

ԱԺ լրատվության և հասարակայնության հետ կապերի վարչություն