Ժողովրդական ինքնապաշտպանության ջոկատի քրդերն «Իսլամական պետության» զինյալների հետ բախման ընթացքում 30 իսլամիստ են ոչնչացրել Սիրիայի հյուսիս–արևելքում։
Ինչպես հաղորդում է «Ֆրանս պրես» գործակալությունը՝ Մարդու իրավունքների վերահսկման մոնիթորինգի սիրիական կենտրոնին հղումով, բախումը տեղի է ունեցել այսօր ալ–Հասաքա նահանգի Քասսիա գյուղում։
Կենտրոնի տվյալներով՝ քրդերի ջոկատներին հաջողվել է իրենց վերահսկողության տակ վերցնել գյուղը, որը ժամեր առաջ գրավել էին իսլամիստները։ Հաղորդվում է նաև, որ բախումների ընթացքում երեք քուրդ է զոհվել։
Հիշեցնենք, որ «Իսլամական պետությունը» «խալիֆաթ» է հայտարարել Սիրիայի և Իրաքի զավթված տարածքներն այս տարվա ամռանը։

Տեղեկացնում է «ՌԻԱ Նովոստի»–ն։