Անդրադառնալով ԼՂ-ի հակամարտության կարգավորման խնդրին՝ Նախիջևանում կայացած Թուրքալեզու երկրների համաժողովի ժամանակ Թուրքիայի նախագահ Աբդուլա Գյուլը հայտարարել է, որ եկել է տարածքային ամբողջականության ապահովման սկզբունքով հարավկովկասյան հակամարտություններին, այդ թվում հայ - ադրբեջանական հակամարտությանը վերջնական լուծում տալու ժամանակը։

Ըստ Թուրքական «Անատոլու» գործակալության՝ թուրքալեզու պետությունների 9–րդ գագաթաժողովում Թուրքիայի նախագահ Ա. Գյուլն ասել է.

«Մեծ կարևորություն ենք տալիս Ադրբեջանի տարածքային ամբողջականությանը, և կարծում ենք, որ Ադրբեջանի տարածքների բռնազավթումը պետք է դադարեցվի՝ որքան հնարավոր է շուտ: Ուզում ենք, որ Ղարաբաղյան հակամարտությունը կարգավորվի դիվանագիտության ու երկխոսության միջոցով: Ուզում ենք, որ Կովկասում խաղաղություն լինի, բայց, անկասկած, այն կսկվի, երբ ավարտվի բռնազավթումը»:

Իր հերթին Ադրբեջանի նախագահ Իլհամ Ալիևը հայտարարել է, որ Նախիջևանը Թուրքիայի հետ սահմանակցող իրենց միակ շրջանն է՝ հավելելով.

«Ադրբեջանական պատմական հնամենի երկրամասի՝ Զանգեզուրի անջատումը Ադրբեջանից և դրա միացումը Հայաստանին աշխարհագրորեն մասնատել է թուրքական մեծ աշխարհը, ինչի արդյունքում այն մի քանի տասնամյակով դադարել է ապրել որպես մեկ ընտանիք, սակայն այսօր մենք մեր գործադրած ջանքերով ամրապնդում ենք մեր կապը, ու թեպետ հիմա մեր միջև աշխարհագրական առումով գտնվում է Հայաստանի կազմում հայտնված ադրբեջանական երկիրը' Զանգեզուրը, թուրքական միասնությունը՝ իրողություն է»: