«ՌԻԱ նովոստի»–ի փոխանցմամբ՝ Ռուսաստանի հետ երկաթգծային հաղորդակցության վերականգնման հարցը Աբխազիայի տարածքով ներկայումս չի քննարկվում։ Այս մասին հայտարարել է Վրաստանի վարչապետի՝ Ռուսաստանի հետ հարաբերությունների կարգավորման հատուկ ներկայացուցիչ Զուրաբ Աբաշիձեն։

Ավելի վաղ վրաց հատուկ ներկայացուցիչը հայտարարել էր, որ երկիրը պատրաստ է քննարկել Սուխում–Թբիլիսի–Երևան տրանզիտային երկաթուղային հաղորդակցության կազմակերպումը, միայն եթե «այն կօգնի կարգավորել աբխազական հակամարտությունը»։

«Մեր կարծիքով դա ռուս–վրացական երկաթգիծն է. եթե սկսենք մտածել այն վերագործարկելու մասին, առաջնահերթ անհրաժեշտ է պարզաբանել քաղաքական հարցերը, և թե ինչպիսի քաղաքական ենթատեքստում այն կարող է վերականգնվել», – հայտարարել է Աբաշիձեն։

Հիշեցնենք՝ 2008թ. օգոստոսին Թբիլիսին խզեց դիվանագիտական կապերը Ռուսաստանի հետ՝ ի պատասխան Մոսկվայի՝ Աբխազիայի և Հարավային Օսիայի անկախության ճանաչման։

7or.am