Այսօր լրագրողների հետ հանդիպման ժամանակ Հայաստանի ֆուտբոլի ֆեդերացիայի նախագահ Ռուբեն Հայրապետյանը անդրդարաձել է այն հրապարակումներին, թե Եվրոպայի 2012թ առաջնության ընտրական փուլի մարտի 26-ին Երևանում կայանալիք Հայաստան-Ռուսաստան խաղն ինքը վաճառել է։ Նրա համոզմամբ, իրենց ցանկանում են վարկաբեկել, քանի որ Հայաստանի հավաքականը լավ է հանդես եկել անցած տարի։

-Այդ գրողները չեն հասկանում, որ երբ գրում են հոդվածներ այն մասին, որ Հայրապետյանը զենքի ու թմրադեղերի վաճառքով է զբաղվում, նրանք վարկաբեկում են Հայաստանի անունը միջազգային բանակցությունների ժամանակ։ Այնքան պետք է խելամիտ լինել, որ երկրի իմիջին չխփել,-հայտարարել է նա՝ հավելելելով.

-Սուտի գողականները, որ նախկինում բանտի կլյուչնիկ են եղել, հիմա ինչ-որ բաներ են գրում։ Նույն մարդիկ, որ մեծ-մեծ խոսում են, դեմքս որ տեսնեն, ինսուլտ կստանան։ Վախում են իրենց անունը գրել հոդվածի տակ։

Նա նաև ավելացրել է, որ իր մեջքին կանգնած է նախագահ Սերժ Սարգսյանը և եթե նրա աջակցությունը չլիներ, վաղուց հրաժարական կտար։

-Ես ուզում եմ հիմա ձեզ ասել, որ երկրի նախագահն իմ առջև խնդիր է դրել հաղթել Ռուսաստանի հավաքականին,-ընդգծել է Ռ. Հայրապետյանը,-դուք պատկերացնու՞մ եք, ինչ եք արել ինձ ու հավաքականի տղաների հետ։ Դա մարմնավաճառություն է կոչվում։ Դուք հասկանում եք, թե ինչո՞ւմ եք ինձ մեղադրում։

7or.am