Երևանի պետական համալսարանի Հայոց պատմության ամբիոնի դոցենտ Յուրա Հովսեփյանը «7օր»-ին ասել է, որ Հայաստանի նորօրյա պատմության վերաբերյալ հայ ժողովուրդն օբյեկտիվ պատկերացում չունի, առաջին հերթին՝ քանի որ իրադարձությունների մասին մարդիկ տեղեկանում են մամուլից, որը երբեմն պատվերներ է կատարում և իրական պատկերը չի փոխանցում, և հետո դեռ որոշ ժամանակ պետք է անցնի, որպեսզի վերջին տարիների պատմությունն ուսումնասիրվի սա՛ռը դատողությամբ։

-Որպեսզի մենք օբյեկտիվ, ճիշտ պատկերացում կազմենք մեր այսօրվա պատմության մասին, մեզ ժամանակ է պետք, որ արդեն ապագայից նայենք մեր անցյալին և կարողանանք ճիշտ կողնորոշվել՝ ի՞նչ և ո՞նց է կատարվել։ Այսօր շատ խնդիրներ կան, որոնք դեռևս պարզ չեն ո՛չ գիտնականներին, ո՛չ քաղաքագետներին,- ասել է պատմաբանը՝ որպես օրինակ բերելով Լեռնային Ղարաբաղի պատերազմը.

-Այսօր ուսումնասիրությունները կատարվում են այն դեպքերով, որոնք չեն կարող օբյեկտիվ ճշմարտությունը ներկայացնել։ Դրա համար ևս ժամանակ է պետք,- նշել է Յ. Հովսեփյանը։

Նրա խոսքերով՝ թեև ղարաբաղյան պատերազմի վերաբերյալ մի շարք ուսումնասիրություններ կատարվել են, սակայն չի կարելի ասել, թե դրանք ամբողջությամբ օբյեկտիվ են. կան սուբյեկտիվ մոտեցումներ։ Մասնավորապես պատմաբանը յուրովի է համարում այն մոտեցումը, թե Լոևն Տեր-Պետրոսյանը հաղթանակած նախագահ է:

-Ճիշտն այն է, որ հաղթողը ժողովուրդն է։ Այդ ժամանակ ո՞վ էլ լիներ նախագահ՝ Լևոն Տեր-Պետրոսյանը, Վազգեն Մանուկյանը, թե մեկ ուրիշը, միևնույն է, իրադարձությունների նման տրամաբանությունը, դեպքերի նման ընթացքը հանգեցնելու էին հաղթանակի։ Իսկ հաղթանակն ապահովվեց ազատամարտիկների և ժողովրդի համբերատարության ու աշխատանքի շնորհիվ։

Փոխարենը պատմաբանը կարծում է, որ եթե ղարաբաղյան պատերազմի տարիներին երկրի նախագահը Լևոն Տեր-Պետրոսյանը չլիներ, ապա հնարավոր է, որ 1990-ականներին Ղարաբաղում տարածքային կորուստներ չունենայինք։

-Շուշիի, Լաչինի ազատագրումից հետո ամռանը մենք սկսեցին տարածքներ կորցնել Ղարաբաղում՝ Մարտակերտում, Շահումյանն ամբողջությամբ կորցրեցինք և այլն։ Եթե Հայաստանի ղեկավարությունն օբյեկտիվ դիտարկեր այդ հաղթանակները, եթե ճիշտ կազմակերպվեր ամենը, մենք նման կորուստենր չէինք ունենա,- նշել է Յ. Հովսեփյանը։

7or.am