ԵԱՀԿ Մինսկի խմբի համանախագահները հույս ունեն մինչև տարվա վերջ կազմակերպել Սերժ Սարգսյանի և Իլհամ Ալիևի հերթական հանդիպումը։ Այս մասին այսօր լրագրողներին ասել է Երևանում գտնվող ԵԱՀԿ Մինսկի խմբի ամերիկացի համանախագահ Ջեյմս Ուորլիքը։

Նա հավելել է, որ դեռ քննարկվում են ԼՂ–ի կարգավորման սկզբունքները և տարրերը, բայց կողմերը դեռևս չեն հասել բանակցային սեղանի շուրջ քարտեզներով նստելու փուլին։

–Հուսով եմ՝ կհասնենք այն մակարդակին, որ հարցերը քննարկենք մանրամասն և սիստեմատիկորեն,– ասել է Ուորլիքը,–մեզ մտահոգում է երկու կողմում էլ առկա վստահության բացակայությունը։ Դա խոչընդոտում է կարգավորման գործընթացին։

Նա նաև ընդգծել է, որ հակամարտության համապարփակ կարգավորումը չի կարող լինել առանց Լեռնային Ղարաբաղի կարգավիճակի հարցի:

–Դրա համար պետք է ԼՂ–ի ժողովրդի կամքի ազատ արտահայտումը՝ որպես համապարփակ կարգավորման մի մաս։ «Վեդոմոստի» պարբերականին տված հարցազրույցում ասել եմ, որ այդ կարգավորման տարրերից մեկն էլ պետք է լինի Լեռնային Ղարաբաղի հարակից տարածքների վերադարձը։ Սա կետերից մեկն է, որ բանակցությունների տարր է,–հավելել է ամերիկացի համանախագահը:

Ինչ վերաբերում է ԼՂ հակամարտության կարգավորման վրա Իրանի և «վեցնյակի» համաձայնության հնարավոր ազդեցությանը, ամերիկացի համանախագան ասել է, որ դրա մասին կարելի է խոսել միայն այն ժամանակ, երբ հստակ կլինի, թե ուր է տանում Վիեննայի համաձայնությունը։

–Մենք ցանկանում ենք, որ ամբողջ տարածաշրջանում լինի խաղաղություն, ժողովրդավարություն և բարեկեցություն։ Դա վերաբերում է Հայաստանի բոլոր հարևաններին,-ավելացրել է Ուորլիքը։

Նշենք, որ ԼՂ–ի խնդրին է անդրադարձել նաև Եվրոպական խորհրդի նախագահ Դոնալդ Տուսկը, ով նույնպես այցով գտնվում է Հայաստանում: Այսօր հրավիրված ասուլիսում նա մտահոգություն է հայտնել հակամարտության գոտում առկա իրավիճակի կապակցությամբ։

–ԼՂ հակամարտության խաղաղ կարգավորումն առաջնահերթություն է Եվրամիության համար: ԵՄ-ն սատարում է ԵԱՀԿ Մինսկի խմբի միջնորդությամբ ընթացող բանակցությունները, որոնք ուղղված են հակամարտության կարգավորմանը: Մենք խրախուսում ենք հետագա երկխոսությունը Հայաստանի և Ադրբեջանի միջև ամենաբարձր մակարդակով: Շատ կարևոր է հարգել հրադադարի համաձայնությունը, զսպվածություն դրսևորել գործողություններում և հայտարարություններում,–ասել է Տուսկը։

7or.am