Նոյեմբերի 11-ին «Հայ ազգային կոնգրեսի» ակտիվի ժողովում Լևոն Տեր-Պետրոսյանը հիշատակել էր Եղիազար Այնթապցու մասին՝ նշելով, որ Էջմիածնի միաբանները նրան Ամենայն հայոց կաթողիկոս են կարգում, միայն թե նա ազգի գլխին փորձանք չբերի ու եկե­ղեցին չպառակտի։

Ըստ բազմաթիվ կարծիքների՝ Լևոն Տեր-Պետրոսյանի այս խոսքերը հասցեագրված են Սերժ Սարգսյանին։

-Հանրապետականի օրակարգում համագործակցության հարց չկա,- «7օր»-ին ասել է ՀՀԿ մամուլի խոսնակ, Հանրապետական խմբակցության քարտուղար Էդուարդ Շարմազանովը, -Հանրապետական կուսակցությունը և նախագահ Սարգսյանը մշտապես երկխոսության և համերաշխության կողմնակից են եղել։ Եթե նրանք մոռացել են, ապա ասեմ, որ դեռևս հետընտրական փուլում նախագահ Սարգսյանը Հանրապետության հրապարակում բոլոր քաղաքական ուժերին կոչ արեց համախմբվել և համագործակցել։ Իսկ համագործակցության լավագույն միջոցն այն կլիներ, որ «Հայ ազգային կոնգրեսը» մասնակցեր այն կլոր սեղաններին, որոնք պարպերաբար կազմակերպում է նախագահ Սարգսյանը։

Է. Շարմազանովը նաև հավելել է, որ ՀՀԿ-ն ի՛նքն է իր օրակարգը ձևավորում, այլ ոչ թե սպասում է, թե ինչ կասի և կանի Լևոն Տեր-Պետրոսյանը կամ որևէ քաղաքական ուժ։

Եվ ընդհանրապես ՀՀԿ մամուլի խոսնակը կարծում է, որ Լևոն Տեր-Պետրոսյանի ելույթը հակասական է։

-Առաջին մասում նա հերթապահ քննադատությամբ է հանդես գալիս՝ ցանկանալով պահել ընդդիմության էլեկտորատը, սակայն նրա փաստարկները համոզիչ չեն։ Երկրորդ մասում նա գնահատականներ է տալիս նախագահի քաղաքականությանը, և ընդունում, որ ընտրություններում իրեն հաղթած թեկնածուն արժանի է Նոբելյան մրցանակի, և շաբաթվա եվրոպացի է անվանում։ Ավելին, ասում է՝ Սերժ Սարգսյանը 21-րդ դարի իրատես, հեռանկարային քաղաքական գործիչ է, ով չի իրականացնոմ ոչ ամբոխահաճո քաղաքականություն։

ԼՂ-ի վերաբերյալ Լևոն Տեր-Պետրոսյանի կանխատեսումների հետ էլ Էդուարդ Շարմազանովը համամիտ չէ՝ դրանք համարելով անիրատեսական.

-Տեր-Պետրոսյանը խոսել է Ղարաբաղի մասին՝ ընդհանրապես չխոսելով կարգավիճակի հարցի մասին։ Ի տարբերություն իրենց՝ մեզ համար գլխավոր հարցը կարգավիճակի հարցն է, և Ղարաբաղը չի կարող լինել Ադրբեջանի կազմում։

Ամփոփելով ողջ ելույթը՝ Հանրապետական խմբակցության քարտուղարը նշել է, որ այն առավելապես ուղղված է ընդդիմադիր մեկ այլ ճամբարի դեմ.

-Այժմ 2012թ. խորհրդարանական ընտրություններին են նախապատրաստվում, և Տեր-Պետրոսյանը շատ լավ հասկանում է, որ կա նաև այլ բևեռ։ Այդ քաղաքական ուժերը պայքարում են մեկը մյուսի դեմ, որպեսզի ընդդիմադիր էլեկտորատի ձայներին տիրանան։ Ավելի շատ դա Տեր-Պետրոսյանի և ընդդիմադիր այլ թևի ներքին մրցակցության խնդիր է։

7or.am