Ինչպես հայտնել էինք, Բաղրամյան պողոտայում «Ո՛չ թալանին» նախաձեռնության կազմակերպած նստացույցի մասնակիցներին փողոցն ազատելու համար ոստիկանությունը 6 ժամ ժամանակ էր տվել, այսինքն՝ մինչև 2015թ. սեպտեմբերի 12-ի առավոտյան ժամը 05:00–ն։

Վաղ առավոտյան ոստիկանությունը սկսել է նստացույցը ցրելու հատուկ գործողությունը՝ կիրառելով նոր տեխնոլոգիա։ Ոստիկանների մի հոծ շարք, միմյանց թևանցուկ արած, ճեղքել անցել է ցուցարարների միջով՝ այդպիսով կիսելով բողոքի գործողության մասնակիցների պատը։ Դրանից հետո ցուցարարներին ստիպել են անցնել մայթեր՝ շղթա կազմելով և թույլ չտալով դուրս գալ պողոտա։

Ցուցարարներից առնվազն 3–ի ինքնազգացողությունը վատացել է, որոնցից երկուսը «Ո՛չ թալանին» նախաձեռնության համակարգող խմբի անդամ են։ Կան նաև բերման ենթարկվածներ։

Հատուկ գործողությունից հետո Բաղրամյան պողոտա է դուրս բերվել ջրցան մեքենան, որը լվացել է փողոցը։

Բաղրամյան պողոտայում արդեն իսկ վերսկսվել է երթևեկությունը։

7or.am