«Գազպրոմ»-ի կառավարման խորհրդի փոխնախագահ Ալեքսանդր Մեդվեդևը հայտարարել է, որ «Թուրքական հոսք» գազատարի գործարկման ժամկետները երկարաձգվել են Թուրքիայի քաղաքական ճգնաժամի պատճառով։ Այս մասին հայտնում է «ՏԱՍՍ»-ը։

Հիշեցնենք՝ ավելի վաղ Թուրքիայի էներգետիկայի և բնական պաշարների նախարարության խորհրդականի տեղակալ Սեֆա Սադըք Այթեքինը հայտարարել էր, որ «Թուրքական հոսք» նախագիծը սառեցվել է։

Նրա խոսքով՝ Ռուսաստանի հետ բանակցությունները մտել են փակուղի, քանի որ ռուսները «BOTAŞ» և «Գազպրոմ» ընկերությունների միջև գնային զեղչի շուրջ բանակցությունները դիտարկում են իբրև նախապայման:

«Փոխարենը՝ մենք դա ընդունում էինք որպես մեկնակետ,–ասել էր նա,–և քանի որ հունիսին Թուրքիայում կայացած ընտրություններից հետո կառավարություն չկազմվեց, բանակցությունները հենց այս կետում էլ մնացին»:

Այթեքինը նաև հավելել էր, որ բանակցային սեղանի շուրջ գտնվող երկու կողմում էլ անվստահություն կա, իսկ եթե Ռուսաստանն առանց նախապայմանների գնային զեղչ իրականացներ, ապա այժմ շատ ավելի հուսադրող կետում կլինեին:

7or.am