Ընդդեմ սահմանադրական փոփոխությունների «Չե՛ք անցկացնի» քաղաքացիական նախաձեռնության անդամները Գյումրիում իրազեկում են իրականացնում այնտեղ սեպտեմբերի 25–ին կայանալիք հանրահավաքի մասին: Նախօրեին հինգ հազարից ավել թռուցիկ է բաժանվել:

–Այսքան ոգևորված ժողովուրդ ես չեմ հիշում, որ ինչ-որ տեղ տեսած լինեի. համատարած դժգոհություն և վճռականություն՝ պայքարելու իշխանության դեմ, սահմանադրական այս ավանտյուրայի դեմ,–Գյումրիի «Ասպարեզ» մամուլի ակումբում հրավիրված ասուլիսում նշել է «Չե՛ք անցկացնի» քաղաքացիական նախաձեռնության անդամ Դավիթ Հովհաննիսյանը։

Արշակ Մուսախանյանն էլ հավելել է, որ բոլորը շատ լավ հասկանում են՝ սահմանադրական փոփոխություններն արվում են իշխանության վերարտադրության համար։

–Գյումրիում ատում են այս իշխանություններին–ավելացրել է նա։

Իսկ «Չե՛ք անցկացնի» նախաձեռնության անդամ Արմեն Գրիգորյանն ասել է, որ Սերժ Սարգսյանի վերարտադրության դեպքում Հայաստանում ստեղծված սոցիալ-տնտեսական ծանր իրավիճակը է՛լ ավելի կխորանա։

–Կոչ ենք անում գյումրեցիներին, բոլոր քաղաքացիներին համախմբվել, տապալել այս սահմանադրական փոփոխությունները, որպեսզի երկիրը կանգնի դրական ուղու վրա, -նշել է նա:

7or.am