Մեկնաբանելով մամուլում տարածված լուրերը, թե Բարգավաճ Հայաստան կուսակցությունը, հնարավոր է, վայր դնի Երևանի ավագանու իր մանդատները, ԲՀԿ մամուլի խոսնակ Բաղդասար Մհերյանը «7օր»-ին ասել է, թե այդ լուրը չի համապատասխանում իրականությանը, սակայն որ ավագանու գործունեության մեջ կան հարցեր, որոնք ԲՀԿ խմբակցությանը չեն բավարարում, ակնհայտ է.

-Երեկվա ավագանու նիստում տարաձայնությունը վերաբերում է մի որոշման փոփոխությանը, որի հետևանքով ավագանու նիստերի քվորումը կապահովվեր ձայների ¼-ով, իսկ մինչ այդ գործում էր կարգ, որ ձայների 50%-ով էր ապահովվում։ Հիմա ստացվում է այնպես, որ 17 մարդու ներկայությամբ արդեն 65 հոգանոց ավագանու նիստը համարում է, որ քվորում ունի։ Մեր խմբակցությունը դեմ էր դրան։ Խոսվել է ոչ թե այդ պահին մանդատները վայր դնելու մասին, այլ ասվել է, որ եթե այսպես շարունակվի, չի բացառվում նաև, որ մանդատները վայր կդնենք։ Դա ասել է Արման Վարդանյանը։

«Փաստորեն չի բացառվում, որ այդպես էլ կշարունակվի, հետևաբար չի բացառվում նաև մանդատներից հրաժարվելը» լրագրողի մասնավորեցնող հարցին Բաղդասար Մհերյանը պատասխանել է. «Այո՛, չի բացառվում»։

Հարցի առնչությամբ «7օր»-ը կապ է հաստատել նաև Երևան քաղաքի ավագանու ԲՀԿ խմբակցության ղեկավար Արման Վարդանյանի հետ, ով նշել է, որ խմբակցությունում ավագանու որևէ անդամ երբեք կառչած չի եղել մանդատներից, և դեպքերի նման զարգացման դեպքում չի բացառվում, որ իրենք հրաժարվեն ավագանու մանդատներից։

-Մենք ունենք բազմաթիվ առաջարկներ, ինչպես նաև մոտեցումներ իրենց առաջարկների վերաբերյալ, որոնք չեն ընդունվում։ Եթե այս պայմանները շարունակվեն, և նման ձևով փորձ արվի ձախոխել մեր աշխատանքները, բնականաբար մենք միգուցե և ավելի արմատական մոտեցում ցուցաբերենք, և քանի որ քաղաքականության մեջ ոչինչ չի բացառվում, միգուցե նաև չշարունակենք մեր աշխատանքը ավագանիում։ Սակայն այս պահին այդ հարցն օրակարգում դրված չէ,- ասել է Արման Վարդանյանը։

Ընդհանուր առմամաբ, գնահատելով քաղաքապետարանի և մասնավորապես քաղաքապետ Գագիկ Բեգլարյանի աշխատանքը՝ Արման Վարդանյանն ասել է, որ աշխատանքներ տարվում են, սակայն պետք է վերանայել քաղաքապետ-ավագանի աշխատանքների տրամաբանությունը։

-Եթե մի տեղ կա երկու քաղաքական ուժ, ապա որևիցե լուծում պետք է ի կատար ածվի քաղաքական կոնսենսուսի հետևանքով։ Եթե այդ բաղադրիչները բացակայում են, աշխատանքը տարվում է ոչ ճիշտ հունով։ Իսկ քաղաքապետի աշխատանքից երևանցիները պետք է գոհ լինեն, մենք գոհ ենք մեր աշխատանքից, մեր արած քայլերից և այն կառուցողական առաջարկներից, որոնք մենք կարողանում ենք անել, և որոնց մի փոքր մասն էլ կարողանում ենք ի կատար ածել,- ընդգծել է Ա.Վարդանյանը։

7or.am