Սիրիական հակամարտության հարցով Վիեննայում հրավիրված բանակցությունների մասնակիցները չեն կարողացել համաձայնության գալ այդ գործընթացում Սիրիայի նախագահ Բաշար Ասադին վերապահվելիք դերի շուրջ։ Այս մասին, «ՌԻԱ նովոստի»–ի փոխանցմամբ, ասել է Իրաքի ԱԳՆ ղեկավար Իբրահիմ ալ–Ջաֆարին։

Հանդիպման մի շարք մասնակիցներ պահանջել են Ասադի հրաժարականը, մյուսներն առաջարկել են սիրիացիներին թողնել այդ խնդրի լուծումը։

«Չհաջողվեց պայմանավորվել քաղաքական կարգավորման գործընթացում Ասադի դերակատարման մասին»,–ասել է նախարարը՝ հավելելով, որ բանակցությունների մասնակիցները կարողացել են համաձայնության գալ ահաբեկչության դեմ պայքարի և Սիրիայի հակամարտության քաղաքական կարգավորման հարցերի շուրջ։

Ավելի վաղ ՌԴ նախագահի խոսնակ Դմիտրի Պեսկովը հայտարարել էր, որ Ռուսաստանը շարունակում է պնդել, որ Սիրիայի նախագահ Բաշար Ասադի հետագա ճակատագիրը պետք է որոշի Արաբական Հանրապետության ժողովուրդը։

7or.am